Stroßnwearta

Da Stroßnwearta (dt.: Straßenwärter) is in Deitschland a ausbuidde Fochkroft, de fia'n vakeahssichan Betrieb und Untahoit vo Stroßn und Weng vaontwoatli is. Oschtejung findd da Stroßnwearta bei Stroßn- und Autobohmoastarein sowia kommunoin Bauhef.

Stroßnwearta beim Eihsodz im Wintadienst

Gschicht

Voagänga vom heiting Stroßnwearta woa da Chausseewearta. Ea woa bis Middn vom 20. Joarhundad fia de Instondsedzung vo Stroßn und Wegn in seim Zuaständigkeitsgebiet vaontwoatli. Ausgrisdd mid om Zwoarodkorrn, Schaufe und Besn hod'a kloanare Ausbessarungsoabatn on de Kies- und Schottastroßn duachgfiahd. Des Weitan woa'ra aa fia'n Wintadienst und de Stroßnreinigung zuaständig.

Da Beruf Stroßnwearta is 1968 af Betreim vom Vaband Deitscha Stroßnwearta ois Ausbuidungsberuaf oeakonnd und mid de Beruafsoadnungsmiddl ausgstodd. Vo seim Tätigkeitsfejd gseng, ghead'a zua de ejdasdn Beruaf, denn a leistungsfähigs Stroßnnedz woa fia olle Kuituan vo Bedeitung. So san scho im Oitatum Peasona, meisd Söjdna, domid beaftrogd worn, des Stroßennetz ausz'baun, z'bewochn und z'pfleng. Stroßnwearta san ois Speziojistn in da Stejung vo Fochoabata in de Stroßn- und Autobohmoastarein und in de Bauhef vo de Kommunen tätig. Da Beruaf is stoak technisiad und motorisiad.

Haptafgom

De Haptafgom vom Stroßnwearta lieng in da „Eafuijung vo da Vapflichtung stootlicha und kommunoia Stejn zua Eahoitung vo da Vakeahssichaheit af effentlichn Stroßn und Weng.“

Des bedeidd im Speziejn:

• Obsichan vo Unfoistejn und Baustejn
• Strein und Raima vo de Stroßn im Rohma vom Wintadienst
• Instondhoitungsmoßnohma on Bauweakn (Tunnel, Bruckn, Duachläss etc.) und Stroßn duachfiahn
• As Duachfiahn vo de so gnenndn Grea- und Gehejzpflege
• Greaflächn und Sichtbereiche on Stroßn und Kreizunga mähn
• Vakeahszeichn und Vakeahs(leit)eihrichtung wia z. B. Leitpfostn, Vakeahszeichn, Schutzplankn obringa und wartn
• Kontroi vom Stroßnnedz
• Stroßnreinigung

Ausbuidung

De duale Ausbuidung dauad in da Regl drei Joar, wobei de Afnohm mindestns de Beruafsschuireife voaraussedzd. Weitahi san a guade Affossungsgob, technischs Vaständnis und hondweaklichs Gschick vo Voatei. Teamfähigkeit und Flexibilität san unealässli.

De gsundheitliche Eignung zum Eaweab vo da Fiahrascheinklass CE is Voaraussedzung fia de Eihstejung, do da Eaweab vo dem Fiahraschein festa Bestondtei vo da Ausbuidung is.

Sichaheitsrisikn

Vui Oabatn wean bei laffndm Vakeah duachgfiahd, wobei de Dienstfoahzeige ois Obsicharung vo de Baustejn diena. Unochtsomkeit und Ignoranz vo de Vakeahsteinehma san haifig de Uasoch vo schwean Unfäjn, in de Stroßnwearta vawickld wean.

Schutzpatron

Da Vatikan hod om 22. Feba 2011 af Nochfrog vo da Intressnvatretung vo de Stroßnwearta VDStra bstätigd, doss da heilige Christophorus da Schutzpatron vo de Stroßnwearta in Deitschland is.

Afstiegschancn

Stroßnwearta kenna noch entsprechnda Beruafseafoahrung zum Voaoabata (Obastroßnwearta), Kolonnafiahra, Teamleita, Obteijungsleita, Strecknwart oda Kroftfoahra afsteing. Noch mindesdns drei Gsejnjoarn wead aa a Weidabuidung zum Stroßnweartamoasta obotn.

Woppn

1988 is de Stroßnwearta a Beruafszeichn gstifdd worn. Es zoagd af'm Woppnschuid an Horizont und's Betätigungsfejd vo de Stroßnwearta, und zwoar Stroß und Londschoft. De historische Doastejung vom Rod vaweisd af'n Stroßnvakeah, de Doastejung vom Eiskristoi af de bsondan Easchweanisse vom Stroßnbetriebsdienst bei da Bekämpfung vo Schnee und Eis. A Meahzweckfoahzeig – meisd Unimog – stehd fia de Technisiarung und Motorisiarung vo da Berufsoabat vo de Stroßnwearta.

Schau aa

• Wegmocha

Literatua

• Fachkunde für Straßenwärter. Donar Verlag GmbH, ISBN 978-3-9807359-7-1.
• Die Straßenwärter. Geschichte des Berufes, seines beruflichen Umfeldes und der Fachgewerkschaft. Donar Verlag GmbH, ISBN 978-3-980-22242-6.

Im Netz

• Verband Deutscher Straßenwärter