Wüdschnau
| Der Artikl is im Dialekt Tirolarisch (Untalond) gschriem worn. |
Di Wüdschnau (amtli: Wildschönau) is a Gemoa im Bezirk Kufstoa in Tiroi, Östareich. Sie astreckt si iwa a 24 Kilometa långs Hoachtåi, des sidlich vo Wörgl ufång und a nua vo doo duach a feste Stråssn arreichbår is.
| Wüdschnau Wildschönau | ||
| Wobben | Ésterreich-Korten | |
|---|---|---|
|
| |
| Basisdaten | ||
| Stoot: | Ésterreich | |
| Bundeslånd: | Tirol | |
| Pólitischer Bezirk: | Kufstein | |
| Kfz-Kénnzaachen: | KU | |
| Flechen: | 97,41 km² | |
| Koordinaten: | 47° 27′ N, 12° 4′ O | |
| Heechen: | 936 m ü. A. | |
| Eihwóner: | 4.342 (1. Jen. 2023) | |
| Bevökarungsdichten: | 45 Eihw. pró km² | |
| Póstlaatzoin: | Oberau: 6311 Auffåch: 6313 Wüdschnau: 6314 | |
| Vurwoi: | 05339 | |
| Gmaandkénnziffer: | 7 05 30 | |
| NUTS-Región | AT335 | |
| Nétzseiten: | ||
| Politik | ||
| Burgermaaster: | Johannes Eder seit 2016 (ÖVP) | |
| Gmaandrot: (Wahljahr: 2010) (17 Midgliader) |
||
 Oberau in da Wüdschnau | ||
| Quelle: Gmaanddaten bei da Statistik Austria | ||
Geografie Werkeln
Di Wüdschnau astreckts si iwa a 24 Kilometa långs Hoachtåi und liegg in die Kitzbichla Åipn. Sie bsteht aus einign Weilan und den via Kirchdöafan Niederau, Oberau, Auffåch und Thiarbåch.
Die Wüdschnaua Åchn valafft vom Siedljoch iwa Auffåch, Mühltåi und iwa die Kundla Klåmm in'n Inn eini.
Im Westn grenzt a Beagkettn die Wüdschnau vom Åipbåchtåi oo, de aus folgendn Beagn bsteht: die Gratlspitz (1899 m), da Schatzberg (1898 m), die Joelspitzn (1964 m), an Lämpersberg (2202 m), an Kloanen Beil (2197 m), an Sonnjoch (2287 m) und an heachstn Beag vo da Wüdschnau, nämlich an Groaßn Beil mit 2287 m.
Östlich vom Hoachtåi begrenzn da Roßkopf (1731 m), as Födåiphorn (1923 m), as Schwaigberghorn (1990 m), Breitegg-Gern (1981 m), die Wüdkarspitzn (1961 m) und die Breiteggspitzn (1868 m). Da sidliche Åbschluss vo dem östlichn Tåitoal san da Roßkopf und da Markbåchjoch (1440 m).
Dee boadn Kettn wean ois sidlicha Tåiåbschluss mit an Pass nåmens Siedljoch (1689 m) vabundn, dea di Wüdschnau iwa an Långn Grund mit da Kelchsau vabindet.
Im Nordn wead die Wüdschnau duach a niedrigare Beagkettn vom Untainntåi östlich vo Wörgl oogrenzt, mit di folgendn Beag: Gratlspitz, Thiabåcha Kogl (1312 m), an Krångjoch (1425 m), an Sonnberga Jöchl (1285 m), an Möslåimkögl (1109 m). Zwischn an Thiabåcha Kogl und an Krångjoch wead dee Beagkettn duach die Kundla Klåmm untabrochn.
Nåchbårgemoana Werkeln
Åipbåch, Brixlegg, Hopfgåschtn im Brixntåi, Kundl, Rådföd, Wörgl
Gschicht Werkeln
Die Wüdschnau is easchtmåis im Joa 1190 uakundlich awähnt woan, ois irgend a boaricha Graf a Schenkung an as Klosta Herrnchiamsee gmåcht håt. Åb'n 16. Joahundat san an den Åbhängen vo da Gratlspitz Silwa- und Kupfaerze ååbaut woan, dee in Brixlegg vahüttet woan san. Im 19. Joahundat is da Beagbaubetrieb jedoch wieda eigstööd woan, då es si nit rendiat håt. Im Joa 1811 is die Gemoa Wüdschnau gründt woan. Seit 1911 gibs mit da Kundla Klåmm a Vabindung mit'n Untainntåi.
As Wåppn Werkeln
Da Sage nåch håt uasprünglich a See as Hoachtåi vo da Wüdschnau bdeckt, an dessn Ufa a Dråch glebb håt. A Baua håt an Dråchn tötet und dabei håt da Dråch an Föösn, dea an See aufgstaut håt, zastöat und as gånze Wossa is iwa die Kundla Klåmm ågloffn und somit is as Hoachtåi fii di Wüdschnau frei woan. As Wåppn zoagg an Dråchn aus da Sage.
Wirtschafd und Tourismus Werkeln
In da Wüdschnau gibbs 260 Bauanheef, dee groaßtoals ois Beagbauanheef eizstufn san. Da Hof "Stödl" am Oberauer Sonnbeag is auf 1334 m da heagstgleengne Beagbauanhof.
Di Wüdschnau setzt eha auf an sanftn Schitourismus und wüü koan åipinen Skizirkus wia Kitzbichi oda Soiboch-Hintaglemm doastöön. Es gibb zwoa vaschiedene Schigebiete, oamoi am Markbåchjoch und oamoi am Schatzberg mit insgsåmt 70 km Schipistn in'n Schierigkeitsgradn Blau bis Schwårz.
Deazeit is a Vabindung ins Åipbåchtåi plant woan, dee 14,5 Millionen Euro kostn soid. Die Beagstation soid am Schatzbeag lieng, die Mittlstation untahåib vo da Pechåim und die Tåistation direkt nem da Böglbåhn in Innaåipbåch. Somit soid as gånze Schigebiet danåch 45 Ånlång, 127 Pistnkilometa und an Höhnuntaschied vo 1.573 m aufweisn. Somit woins arreichn, dass da Åntoal vo die Gäste wieda steigt, weil in boadn noo trenntn Schigebietn a Valust då wår. Die Aöffnung wor in da Schisaison 2012/13.[1]
Im Summa gibs in da Wüdschnau rund 300 Kilometa Wåndaweeg mit de Gondlbåhnen am Markbåchjoch und am Schatzbeag ois Aufstiegshüüfn. Außadem gibs a no a khoazts Freischwimmbåd, finf Hotelhåinbäda, Saunas, a Minigoifånlåg und a no drei Tennisplätz.
Im Winta gibs nem am oipinen Schifåhn an no 50 Kilometa Långlaufloipn, 40 km Wintawåndaweeg, Pfeadeschlittnfåhrtn und 3 graimte Nordic-Walking-Streckn.
Die Wüdschnau håt in etwa 7.000 Gästebettn.
Sehne und Techta vo da Wüdschnau Werkeln
- Hans Haas, Cheefkoch vom Tantris in Minga
- Alois Hörbiger, Orglbaua, Groaßvåda vom Hanns Hörbiger, dem Begrinda vo da Schauspüüadynastie Hörbiger
- Sixtus Lanner, östarreichischa Politika bei da ÖVP
- Norbert Siedler, Autorennfåhra
- Andreas Thaler, östarreichischa Låndwiatschåftsminista und Grinda vo da brasilianischn Gemoa Dreizehnlindn
- Maria Katharina Klingler, Gründerin des Fanklubs des Fußballstars Mario Matt
Städtpartnaschåftn Werkeln
- Dreizehnlindn (åmtl.: Treze Tílias) in
Brasilien
Oanzlnåchweis Werkeln
- ↑ Da Schigebiets-Zsåmmenschluss is präsentiat woan. seilbahn.net, 20. Juni 2011, abgerufen am 20. Juni 2011.