Der Bulle von Tölz: Krieg der Camper
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Krieg der Camper |
| Produktionsland | Deitschland |
| Originalsproch | Deitsch/Boarisch |
| Läng | 92 Minutn |
| Oitasfreigob | FSK 12 |
| Einordnung | Staffel 13, Foig 5 63. Foig insgesamt |
| Easchdausstrohlung | 27. Meaz 2007 auf ORF 1 |
| Stab | |
| Regie | Wolfgang F. Henschel |
| Drahbuach | Andreas Föhr, Thomas Letocha |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Thomas Meyer |
| Schnitt | Michael Breining |
| Bsetzung | |
| |
Krieg der Camper (Orbatstitl: Die toten Campingplätze[1]) is a deitscha Feansehfuim van Wolfgang F. Henschel ausm Joar 2007 noch on Drahbuach van Andreas Föhr und an Thomas Letocha. Es is de 63. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 27. Meaz 2007 af ORF 1 ausgstroit worn.
Handlung Werkeln
Da Campingblotzbesitza Karl Prengel nimmt a tedliche Dosis E 605 ei und schreibt on Obschiedsbriaf mid on Moardgständnis. An Naman vo sein Opfa bleibt ea schuidi, wei ea z gach stiabt. On seina Leich wead fremds Bluad festgstejd, woahrscheinli des van Moardopfa.
De Kriminala Benno Berghammer und Nadine Richter finden außa, doss da Karl Prengel midm Besitza van ogrenzadn Campingblotz, an Uwe Mautner, seit mehrane Joar on schiachn Nochboarschoftskriag gfiahd hod. Da Mautner is seit deara Nocht, wo da Prengel si sejba umbrocht hod, vaschwundn, und in da Näh vo de Campingblätz san Spuan vo on Autounfoi. An Prengel sei Blotzwart Manfred Göpping vastrickt si in Widasprich; drum beobochtn da Berghammer und de Richter eam. Se foign eam zu ara Hittn, wo ea an Uwe Mautner eigspeat und mid Lemsmiddl vasorgt hod. Da Mautner wead mid Knochabrich und innare Valetzungan ins Kranknhaus brocht. Da Göpping sogt, doss ea an Prengel vorm Gfängnis bewoahrn woit, oiso hoda an Mautner weggabringa miassn; ibafoarn hoda eam oba ned.
Emfois vaschwundn is de Rechtsanwäitin Tatjana Rankowitz. Mid deara hod da Tode aa gstriddn, wos dmid zammhängt, doss se und ia Cousin Manfred Göpping gmoasam a Schloss bsitzn. Da Prengel woit nämli de Rankowitz zun Vakauf van Schloss ibaredn. Wei s Handy vo da Anwäitin zletzt in da Gengd um an Campingblotz eigloggt woar, kannt se as gsuachte Moardopfa sei, oba ia Mo is davo ibazeigt, doss se no lebt.
Schliaßli gibt’s no Hiweis af on Campinggost aus Dortmund, an Heinz Klöngsen, dea wo am Omd vor an Prengel sein Sejbstmoard oroasn soid, oba scheinboar nia okemma is. De Spuansicharung hod im Müllcontainer van Campingblotz neiweatige Campingausristung gfundn, de wo an Klöngsen ghean kannt. Außadem hod d’Resi Berghammer gseng, wia da Campinggost Gregor Bauer ban Prälatn Hinter beicht und eam danoch on Plastikbeidl ibagem hod. Wia si außastejd, woarn a Goidkettn und a goidne Uhr drinnad, de wo an Heinz Klöngsen gheard hom. Mid da Huif vo ara Skizzn, de wo da Gregor Bauer fian Prälatn in on Vasteck hintalossn hod, wead de Leich van Klöngsen im Moor gfundn. Vo ia stammt as Bluad, des wo on an Karl Prengel sein Kearpa gfundn worn is.
Da Berghammer und de Richter findn außa, doss am Auto vo ara gwissn Helga Gascher a Kotflügl repariat worn is. Se gibt zua, doss a Vahäitnis midm Uwe Mautner hod, oba as Foarzeig hods fia ra poar Dog an Karl Prengel sein Sohn Pit borgt, dea wo bei ia orbat. De Kommissar lossn noch eam fahndn und kriang boid draf de Mejdung, doss sei Motorradl vorm Kranknhaus steht.
Da Pit Prengel gsteht an Uwe Mautner am Kranknbett, doss ea seit zwoa Joar a hoamlichs Vahäitnis mid seina Stiaftochta Nina hod, und schlogt vor, doss an Streit zwischad eanare Famijn beileng, wei ea ois Sohn eh nix dafia ko. Wia da Mautner si undabittlich zoagt, mocht da Pit si om Lemseahoitungssystem zun schoffa. De Kommissar kemman grod no rechtzeidi dazua und nehman eam wegan vasuachtn Moard fest. Ea sogt, doss ea koan ondan Ausweg fia eanare Liab gwisst hod. Zun Tod van Heinz Klöngsen eafoarn de Kriminala, doss dea zua Polizei geh woit, wei ea midkriagt hod, wia da Uwe Mautner van Pit ogfoarn worn is. Da Karl Prengel woit ned, doss sei Sohn wegan Uwe Mautner ins Gfängnis kimmt, und hod an Klöngsen im Streit daschlong. Wia da Polizist Schmidt an Pit Prengel obfiahn wui, kimmt de Nina Mautner ogrennt und sogt, doss se ian Stiafvoda ogfoarn hod, oba da Pit widaspricht ia. So geht s Gständnis hi und hea.
In da Zwischnzeid hod si aa s Rätsl um de vaschwundne Anwäitin Tatjana Rankowitz glest: Ia Mo hod festgstejd, doss sei Frau midm Koch duachbrennt is und olle Kontn plindad hod.
Hintagrund Werkeln
Gfuimt worn is z Däiz und z Gaißach;[2] ois Schaublotz fia de „Pension Resi“ homs as Hollerhaus Irschnhausn heagnumma.
Kritik Werkeln
De Programmzeitschrift TV Spielfilm schreibt: „Trantütig inszeniert und arm an Lachern.“[3]
Im Netz Werkeln
- Krieg der Camper in der Internet Movie Database (englisch)
- Krieg der Camper bei Fernsehserien.de
Beleg Werkeln
- ↑ Krieg der Camper bei Crew United
- ↑ Krieg der Camper – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Krieg der Camper – Filmkritik bei TV Spielfilm
| Vorherige Foig 20. Meaz 2007: Wiener Brut |
Episodnlistn | Nächste Foig 16. Aprui 2008: Das Ende aller Sitten |