Der Bulle von Tölz: Das Ende aller Sitten
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Das Ende aller Sitten |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 14, Foig 1 64. Foig insgesamt |
| Easchdausstrohlung | 15. Aprui 2008 auf ORF 1 |
| Stab | |
| Regie | Wolfgang F. Henschel |
| Drahbuach | Petra Lüschow, Carolin Otto |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Randolf Scherraus |
| Schnitt | Michael Breining |
| Bsetzung | |
| |
Das Ende aller Sitten is a deitscha Feansehfuim van Wolfgang F. Henschel ausm Joar 2008 noch on Drahbuach vo da Petra Lüschow und da Carolin Otto. Es is de 64. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 15. Aprui 2008 af ORF 1 ausgstroit worn.
Handlung
WerkelnDa Regisseur Osso Toregger, dea wo z Hollywood eafoiglos woar, draht z Däiz on Liabesfuim, oglahnt on Goethes Roman Die Wahlverwandtschaften. Aa sei oida Schuifreind Benno Berghammer vasuacht si ois Schauspuia. On oan Dog findt da Toregger in da Friah im Swimmingpool vo seina Villa de Leich vo sein Gspusi Jana Fitz, de wo in dem Fuim a Haptroin gspuid hod. Da Kommissar Berghammer und sei Kollegin Nadine Richter eafoarn van Osso Toregger, doss d’Jana Fitz im drittn Monat vo eam schwonga woar. An Toregger sei Frau Wally daweckt an Oschein, wia wonn de Liabschoft vo ian Mo koa Problem fia se woar.
Da Stootsanwoit Dr. Georg Lenz ziagt an Benno Berghammer wega Befongaheit van Foi ob; da Kommissar eamittlt oba privat weida.
Laut an Grichtsmedizina Dr. Robert Sprung is d’Jana Fitz on on Puizgift gstorm, des wo on Oignsoft beigmischt woar. Da Todeszeidpunkt ko ned genau festgstejd wean, wei de Wiakung van Gift eascht sechs bis ocht Stund nochm Einehma eitritt. On da Hiftn vo da Todn is a frische Tätowierung mid japanische Schriftzoachn.
Da Osso Toregger is ibazeigt, doss da Giftoschlog eigentli eam goidn hod, wei nua ea jedn Morgn Oignsoft trinkt. Wega seina Vagangaheit ois Pornofuimproduzent is ea ständi Ofeindungan ausgsetzt und is aa scho vor seina Villa oggriffn worn.
De Kriminala gengan zua Shanna Moser, wei vo ian Esoterikbuachlodn aus mehrfoch bei da Jana Fitz ogruafa worn is; dazua hod da Osso Toregger van sejbn Oschluss aus Drohoruaf kriagt. De Moserin sogt aus, doss nix mid deara Soch z doa hod; iare Ogstejte und ia Sohn Jim häddn emfois Zuagriff af des Telefon. De Shanna und da Jim Moser woin d’Jana Fitz nua van Seng kennt hom, und se gem si gengseiti a Alibi fian Voromd.
In on Tattoostudio eafoart de Nadine Richter, doss de japanischn Schriftzoachn on da Hiftn van Opfa fia „Ewigkeit“ und „Liebe“ stengan. Da Bsitza hod des Motiv da Jana Fitz und an Jim Moser gstocha.
Dawei nochm Jim Moser gsuacht wead, stejd si außa, doss da Stootsanwoit Lenz in on Medienfonds investiat hod, aus dem wo Mittl in an Toregger sei Fuimproduktion gflossn san. Da Lenz, dem wo des peinlich is, schlogt an Kommissar Berghammer vor, doss ea wieda eamittln deaf, wonn ea de Soch vagisst.
Wia da Berghammer und de Richter in da Villa van Toregger weidane Befrogungan duachfiahn, kraxlt da Jim Moser mid on Baseballschläga iba d’Goartnmaua, wead oba vo de Leibwächta obgfonga. Ea eakleart si zu ara Aussog afm Kommissariat bereit, haut donn oba ob.
De Kommissar eafoarn vo da Shanna Moser, doss da Osso Toregger an Jim sei Voda is. Se hod’s eam om Dog noch da Jana ian Tod gsogt; da Jim woaß oba no nix davo. As Alibi fia ian Sohn ziagt de Moserin zruck; se wui zua froglichn Zeid mid an Osso Toregger zamm gwen sei.
Da Osso Toregger wead bei da Nocht vo on Eibrecha mit on Baseballschläga niedagschlong, trogt oba nua leichte Valetzungan davo. Ban Eibruch is sei Schusswoffn weggakemma. De Wally Toregger vadächtigt an Jim Moser dahinta, wei ea si vo sein Voda vanochlässigt gfuid hom kannt. Schliaßli stejd si oba außa, doss de zwoa Toregger an Ibafoi inszeniat hom, weis an Vadocht afn Jim Moser lenkn woitn. De Kommissar gengan davo aus, doss d’Jana Fitz steam miassn hod, wei da Osso Toregger eifasichtig af se woar. Laut da Wally Toregger san eam bei ara Schönheitsoperation de Samensträng duachtrennt worn, oiso ko ea ned da Kindsvoda sei. De Genanalyse bstätigt zwoar a Vawandtschoft zwischad da Jana ian Kind und an Osso Toregger, de Ibareistimmung is oba ned hoch gnua. Oiso hod woahrscheinli da Jim Moser as Kind zeigt.
Da Jim Moser zwingt an Osso Toregger mid ara Woffn dazua, doss ea mid eam zua Friedhofskapej foart, wo d’Jana Fitz afboahrt is. Da Toregger soi no amoi mid oagne Aun seng, wos ea ogricht hod. Da Jim wui ned woahrhom, doss da Osso sei Voda is; ea wui nua, doss ea de Tat gsteht. Da Toregger sogt, doss ea si umbringa woit, oba z schwoch zun Dringa van vagiftetn Soft woar. Af amoi is d’Jana vor eam gstondn, as Glasl in da Hond, donn hod se’s ausdrunga. Ea woit se dro hindan, oba ea woar wia glähmt. Wia da Jim de Woffn af eam richt, kemman de Kriminala dazua und woin eam vo sein Vorhom obbringa. Da Osso Toregger drenzd sein Sohn o, ea soi doch obdrucka, und bitt eam um Vazeihung. Donn vasogt sei gschwächts Heaz endguiti.
Hintagrund
WerkelnGfuimt worn is haptsächli z Däiz;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
WerkelnDe Programmzeitschrift TV Spielfilm schreibt: „Tempoarmer, aber humoriger Krimi mit bayrisch-gemütlichem Charme.“ Fazit: „Pornoalarm in Bad Tölz: skurriler Sittenverstoß.“[2]
Im Netz
Werkeln- Das Ende aller Sitten in der Internet Movie Database (englisch)
- Das Ende aller Sitten bei Fernsehserien.de
Beleg
Werkeln- ↑ Das Ende aller Sitten – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Das Ende aller Sitten – Filmkritik bei TV Spielfilm
| Vorherige Foig 27. Meaz 2007: Krieg der Camper |
Episodnlistn | Nächste Foig 7. Mai 2008: Bulle und Bär |