Der Bulle von Tölz: Bulle und Bär
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Bulle und Bär |
| Produktionsland | Deitschland |
| Originalsproch | Deitsch/Boarisch |
| Läng | 93 Minutn |
| Oitasfreigob | FSK 12 |
| Einordnung | Staffel 14, Foig 2 65. Foig insgesamt |
| Easchdausstrohlung | 6. Mai 2008 auf ORF 1 |
| Stab | |
| Regie | Wolfgang F. Henschel |
| Drahbuach | Cornelia Willinger |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Thomas Meyer |
| Schnitt | Michael Breining |
| Bsetzung | |
| |
Bulle und Bär is a deitscha Feansehfuim van Wolfgang F. Henschel ausm Joar 2008 noch on Drahbuach vo da Cornelia Willinger. Es is de 65. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 6. Mai 2008 af ORF 1 ausgstroit worn.
Handlung
WerkelnDa Franz Kufner, da Vorsitzende van Däiza Jogdvarein, trifft si hoamli mid sein Gspusi Lisa Kornfelder af on Hochsitz im Jogdrevia vo de Kornfelder. Wias in ara Nocht vo Geraische gsteart wean, geht da Kufner nochschaung. Oba ea kimmt neamma zruck und wead om nächstn Dog Tod afgfundn. da Grichtsmedizina Dr. Robert Sprung stejd fest, doss de Valetzungan vo ara Bärenprankn kemman. Da Kommissar Benno Berghammer glabt ned, doss a Bär on passioniatn Jaga ibaroschn ko, und nimmt – gegan Wuin van Stootsanwoit Dr. Georg Lenz – zammad mid seina Kollegin Nadine Richter Eamittlungan af, dawei de Jaga an Problembärn suacha und obknoin woin.
Scho boid finden de Kriminala mehrane Persona mid Moardmotiv: Da Viechpräparator Joe Zitzelsberger hod bittare Rache gschworn, wei da Franz Kufner eam wegan Obschuss vo gschitzte Raubvegl ausm Jogdvarein ausgschlossn und dafia gsorgt hod, doss ea koane Großafträg neamma kriagt. Am Wuidmetzga Albrecht Kornfelder hod da Kufner a groß Gschäft vamasslt, indem ea de Earichtung vo ara Schiobfoart samt Lift und Gostbetrieb vahindat hod. De Ursula Kufner, de Witwe van Opfa, de wo ogem hod, doss olle ian Mo meng hom, streit ob, doss ea nemnaus gonga is.
Wia si außastejd, doss da Bär, vo dem wo de Hoar in de Wundn van Opfa gfundn worn san, seit drei Joar tod is, woin de Kommissar schnej an woahrn Täta findn, wei sunst da vadächtigte Bär obgschossn wead. Se frong an Viechpräparator noch an Bärenfej, des wo se bei on friahran Bsuach in seina Weakstott gseng hom, oba ogebli hoda’s ara unbekanntn Peason vakaft. Da Stootsanwoit Lenz, dea wo kommissarisch an Vorsitz im Jogdvarein ibanumma hod, vaweigat eana on Duachsuachungsbefej; außadem wui ea si an Obschuss vo on Bärn ned entgeh lossn.
D’Nadine Richter recherchiat, doss da Franz Kufner vor drei Joar in Begleitung vo da Lisa Kornfelder in Rumänien a Braunbärweiwal ealegt hod und dem sei Fej präpariat und af Däiz nochgschickt worn is. De Lisa Kornfelder hod domois no Haselbeck ghoaßn und is ois Wuaschtvakaifarin bei iam zuakinftign Mo bschäftigt gwen. De sichagstejdn Bärenhoar san emfois aus Rumänien.
De Kriminala konfrontian d’Ursula Kufner mid iare neien Eakenntnisse und eafoarn, doss se vor oan Joar van Vahäitnis vo ian Mo mid da Lisa Kornfelder eafoarn und eam vor de Woi gstejd hod. Ea hod telefonisch mid da Wuaschtvakaifarin Schluss gmocht, und sei Frau hod no amoi a Kind vo eam kriagt. Seitdem is ea raa neamma mid da Lisa Kornfelder vareist. Da Kufnerin ia eawochsna Sohn Max, dea wo efta bei da Nocht mid ara Stianlampn duachn Woid joggt, kannt aus Liab zua Muada an Moard begonga hom, oba ea sogt, doss ea zua froglichn Zeid wega sein kloan Bruada afgwocht is, wei dea imma zua gleichn Zeid gstuid wean wui.
D’Lisa Kornfelder hod eascht vor zehn Monat ian Chef gheiradt; da Albrecht Kornfelder hod se noch da Trennung vo ian Gspusi trest und ia Geborgenheit gem. Se gibt zua, doss se si midm Franz Kufner in da Moardnocht troffa hod. Se hom zammad afm Hochsitz af a Horde Wuidsai gwoart, oba donn hod a Tourengeha mid ara Stianlampn de viecha vascheicht. Da Franz woit eam stejn, oba ea is neamma zruckkemma, oiso is se hoamgonga. Ia Mo is eascht am friahn Morgn hoamkemma, nochdem ea midm Bundesdogsobgordnetn Hans Meidenbauer in on Wiatshaus vasumpft is.
Wei da Albrecht Kornfelder s Bärnfej aus Rumänien bei da Famij Kufner vamuat, dawiakn da Benno Berghammer und de Nadine Richter ban Stootsanwoit Lenz sein Stejvatreta on Duachsuachungsbefej fia de Owesn vo de Famijn Kornfelder und Kufner und ban Joe Zitzelsberger. As Bärnfej wead on olle drei Ort ned gfundn, dafia entdeckt da Polizist Schmidt in an Kornfelder sein Schreibtisch Untalong, wo drinnad steht, doss da Wuidmetzga am Dog vo seina Hoozad as gsamte Vameng aus steialiche Grind on sei Frau ibaschriem hod. Oiso hod ea unta olle Vadächtign as stearkste Motiv, wei wonn sei Frau eam davolafft, is ea mid oan Schlog middllos. Genau des hot de Lisa Kornfelder vorghobt; da Polizist Schmidt woar bei ia, wias an Koffa boggd hod. Wei’s oba weda ra Gständnis no Beweis gibt, ko da Täta nua ibas vaschwundne Bärnfej außagfundn wean. De Kommissar woin an Mearda ra Falle stejn. Dazua soi da Polizist Schmidt de Famijn Kornfelder und Kufner und an Joe Zitzelsberger um viare Nomiddog bei da Hittn van Jogdvarein vasammln.
Zua ausgmochtn Zeid san olle außan Benno Berghammer und an Albrecht Kornfelder vor Ort, aa da Stootsanwoit Lenz is kemma, wei ea eafoarn wui, wos des mid da Vasammlung wean soid. Do taucht ausm Untahoiz a Bär af, dea wo si olladings ois Benno Berghammer außastejd. Ea sogt, doss da Täta in des Bärnfej gschloffa is und donn an Franz Kufner vo hintn daschlong und mid da Prankn valetzt hod. D’Nadine Richter siagt, wia da Albrecht Kornfelder sei Gwahr schussbereit mocht, und ko ian Kollegn grod no rechtzeidi woarna. Da Kornfelder sogt, doss ea an Bärn gseng hod und eam ealeng woit. Da Stootsanwoit Lenz schafft an Kommissar Berghammer, ea soi as Bärnfej ausziang und da Spuansicharung ibagem. Da Kornfelder moant, doss des aa in sein Sinn is, dmid an Berghammer seine Beschuidigungan entkräftet wean. Da Kommissar hoid dageng, doss nua da woahre Täta wissn ko, doss des Fej do ned des vaschwundne is. D’Nadine Richter sogt dazua, doss an Kornfelder vorhea vafoigt hod, wia ra zu ara Hittn gschlichn is, wei ea nochschaung woit, ob des vaschwundne Bärnfej no do is. Da Polizist Schmidt mejdt, dos as Fej in da Hittn gfundn worn is. Wia da Berghammer moant, doss da Schuss ned eam, sondan da Lisa Kornfelder goitn hod, is de fossungslos und schreit ian Mo o, doss in seina Toschn a Stianlampn gfundn hod. Se wiaft eam vor, doss ea se zun Hochsitz vafoigt und an Franz umbrocht hod. Obwoi da Albrecht Kornfelder ois obstreit, wead ea festgnumma.
Hintagrund
WerkelnGfuimt worn is z Däiz, z Dietramszell, z Hall in Tirol und in da Eng (Ortstei vo Vomp) im Karwendl (Ahornboden);[1] ois Schaublotz fia de „Pension Resi“ homs as Hollerhaus Irschnhausn heagnumma.
Da tatvadächtige Bär is van Braunbärweiwal Hera doargstejd worn, zua Zeit vo de Drahorbatn 6 Joar oid und 250 Kilo schwar.[2]
Kritik
WerkelnDe Programmzeitschrift TV Spielfilm schreibt: „Seit Bruno, Knut und Flocke ist das Eis zwischen Mensch und Bär gebrochen. Da hätt’s diese teils recht alberne Krimikomödie nicht mehr gebraucht.“ Fazit: „Einen Goldenen Bären gibt’s dafür nicht …“[3]
Im Netz
Werkeln- Bulle und Bär in der Internet Movie Database (englisch)
- Bulle und Bär bei Fernsehserien.de
Beleg
Werkeln- ↑ Bulle und Bär – derbullevontoelz.de (Memento vom 29. Aprü 2016 im Internet Archive)
- ↑ Sat.1: Bulle trifft Bär – Dreharbeiten für „Der Bulle von Tölz“ – kino.de Sat.1: Bulle trifft Bär – Dreharbeiten für „Der Bulle von Tölz“ – kino.de (Memento des Originals [1] vom 12. Juli 2017 im Internet Archive)
Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis.
- ↑ Der Bulle von Tölz: Bulle und Bär – Filmkritik bei TV Spielfilm
| Vorherige Foig 16. Aprui 2008: Das Ende aller Sitten |
Episodnlistn | Nächste Foig 27. Mai 2008: Die Leonhardifahrer |