Der Bulle von Tölz: Tod eines Strohmanns
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Tod eines Strohmanns |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 6 |
| Einordnung | Staffel 3, Foig 3 15. Foig insgesamt |
| Easchdausstrohlung | 19. Aprui 1998 auf Sat.1 |
| Stab | |
| Regie | Wigbert Wicker |
| Drahbuach | Franz Xaver Sengmüller |
| Produktion | Ernst von Theumer junior |
| Musi | Kristian Schultze |
| Kamera | Charly Steinberger, Peter Lorenz |
| Schnitt | Ingrid Träutlein-Peer |
| Bsetzung | |
| |
Tod eines Strohmanns is a deitscha Feansehfuim van Wigbert Wicker ausm Joar 1998 noch on Drahbuach van Franz Xaver Sengmüller. Es is de 15. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 19. Aprui 1998 af Sat.1 ausgstroit worn.
Handlung
WerkelnBei ara Trachtnmodenschau beobocht de Resi Berghammer, wia da Immobilienhändla Raimund Wendl wogglad ins Schwimmbeckn foid. Fia eam kimmt ajede Huif z spat, ea hod a Stichwundn im Ruckn; s Zuastecha sejba hod oba koana gseng. Am Tatort wead as Futteral vo an Hiaschfänga gfundn; im Toschnkalenda van Opfa stengan Großbuachstom mid Uhrzeitn – wia spata außakimmt, de Ofongsbuachstom vo Weiba, mid dena wo da Wendl a Vahäitnis ghobt hod, drunta de Ehefrau van Landrod Siegfried Wallner und de Katja Flemisch, de wo mid an Bauuntanehma Anton Rambold valobt is, außadem de mindajährige Tochta van Notar Rudolf Wohlschlager. Letztara deafad as stearkste Motiv hom, oba eam is aus gschäftliche Grind a Wendl, wo lebt, nitzlicha ois wia oana, wo tod is.
Da Kommissar Benno Berghammer, wo si in an Wendl sei Sekretärin Brigitte Neuhierl valiabt hod, geht mid da Kollegin Sabrina Lorenz und seina neien Freindin zu ara Party van Baulöwn Rambold. Dort eafoart da Berghammer, doss da Wendl ois „Strohmann“ gorbat und dafia gsorgt hod, doss da Rambold de Grundstickln fia as „Projekt Sonnleiten“ ginstiga kriagt.
Da Immobilienmakla Vitus Sagstätter, an Wendl sei ehemoliga Gschäftspartna, vazejhd da Kommissarin Lorenz zu sein Vahäitnis mid da Brigitte Neuhierl, doss se sei Tanzpartnarin im Trachtlavarein woar, danoch sei Sekretärin, bis da Wendl se obgworm hod. Wonn’s noch eam gonga war, donn warns längst vaheiradt. Wei da Sagstätter an Hiaschfänga hod, nimmt de Lorenz as Messa zua kriminoitechnischn Untasuachung mid; as Futteral is olladings ned zun Findn. Wia außakimmt, doss de Tatwoffn is, wead da Sagstätter festgnumma; ea bestreit an Moard oba vehement und glabt, wei sei Bauanhaus Dog und Nocht offn is, doss ebba sein Hiaschfänga gstoin und noch an Moard zruckglegt hod.
An Kommissar Berghammer foid af amoi ei, doss de oanzige Peason, de wo an Sagstätter lang gnua kennt, doss woaß, doss ea an Hiaschfänga in seina Komod hod, ausgrechnd de Brigitte Neuhierl is. Ea findts bewusstlos in iara Wohnung und ruaft an Nodoarzt. Im Kranknhaus kennans iara as Lem rettn. In ian Obschiedsbriaf legts a umfossends Gständnis ob. Unta ondam schreibts, doss Trei fian Raimund Wendl a Fremdwort woar, doss as Lem mid eam wia d’Hej woar und doss iare Vazweiflung eam hechstns amisieat hod. Oba se is ned vo eam loskemma. Se hod eam vanichtn miassn, sunst häd ea se vanicht.
Hintagrund
WerkelnGfuimt worn is z Däiz und am Spitzingsee;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
WerkelnDe Programmzeitschrift TV Spielfilm schreibt: „Der knifflige Fall ist eine Mordsgaudi.“[2]
Literatuaa
Werkeln- Joachim Winter: Der Bulle von Tölz. Tod eines Strohmanns. Bastei Lübbe 1998, ISBN 978-3-404-12738-2
Im Netz
Werkeln- Tod eines Strohmanns in der Internet Movie Database (englisch)
- Tod eines Strohmanns bei Fernsehserien.de
Beleg
Werkeln- ↑ Tod eines Strohmanns – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Tod eines Strohmanns – Filmkritik bei TV Spielfilm
| Vorherige Foig 1. Meaz 1998: Tod in Dessous |
Episodnlistn | Nächste Foig 10. Mai 1998: Mord im Irrenhaus |