Der Bulle von Tölz: Tod in Dessous
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Tod in Dessous |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 3, Foig 2 14. Foig insgesamt |
| Easchdausstrohlung | 1. Meaz 1998 auf Sat.1 |
| Stab | |
| Regie | Wigbert Wicker |
| Drahbuach | Hans-Jörg Weyhmüller, Wigbert Wicker |
| Produktion | Ernst von Theumer junior |
| Musi | Kristian Schultze |
| Kamera | Charly Steinberger |
| Schnitt | Ingrid Träutlein-Peer |
| Bsetzung | |
| |
Tod in Dessous is a deitscha Feansehfuim van Wigbert Wicker ausm Joar 1998 noch on Drahbuach, des wo ea zamm midm Hans-Jörg Weyhmüller gschrim hod. Es is de 14. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 1. Meaz 1998 af Sat.1 ausgstroit worn.
Handlung Werkeln
Forstorbata findn im Münsinga Woid vor ara Kapej a Leich mid ara großn Plotzwundn am Hintakopf; wias ausschaugt, is de Frau daschlong worn. As Opfa is de Erika Leonberger, de wo vo iam Mo, an Spediteur Michael Leonberger, ois vamisst gmejt worn is. De Kriminala Benno Berghammer und Sabrina Lorenz findn in da Handtoschn vo da Leich de Visitnkoartn vo an Scheidungsanwoit. Ois neie Adress hods eam a Zimma in da Pension „Haus Berneck“ ogem.
As Etablissement is a Oart Puff, oba de Erika Leonberger hod nua oan „Kundn“: an Erwin Haller, Architekt und Mitinhoba van „Haus Berneck“. Wia de Kommissar a weng tiafa grom, stejt si außa, doss da Polizeichef Matern emfois Teihoba is. Draf ogsprocha, is dea zeascht granti wega da Eimischung in seine privatn Oglengheitn, wia ra oba vo da tatsächlichn Vawendung vo da Immobilie eafoart, fordat ea vo da Investorengruppn sei Gejd zruck.
Da Michael Leonberger grot unta Vadocht, wei ea laut Foartnschreiba ausgrechnt am spadn Voromd mid sein LKW untawegs gwen is und sei Frau gsuacht hod, obwoi de wega ian neien Wohnsitz efta iba d’Nocht wegbliem is.
De Apothekarin Stahl, de wo emfois a Zimma im „Haus Berneck“ frequentiat, vazejhd de Kriminala, doss d’Erika Leonberger Schiss vor iara streng glaibign Muada ghobd hod, wei fia de a Scheidung tabu is.
An Kommissar Berghammer sei Muada Resi spricht ban Stootssekretär von Gluck vor, weis um on Zuaschuss fia de Modeanisiarung vo iara Pension osuacha wui. Wei da Stootssekretär koa Schmiagejdzohlung ned kriagt, wead de Berghammerin nauskomplimentiat. Wias am nächsten Dog im „Haus Berneck“ Oregunga fia de Renoviarung suacht, triffts in on Appartement an Stootssekretär, wo unvakennboar af a Domina gwoart hod und gschami im Bad vaschwindt.
Da Neuper vo da Investorengruppn wui de Domina nausschmeißn, oba de eapresst eam mid peinliche Buidln. A weng spada weads kranknhausreif gschlong – van Neuper, dea wo ia d’Handtoschn raubt und de Negativ aus iara Wohnung midnimmt. Mid mehrane davo wui ea Politika eapressn.
Da Erwin Haller wead festgnumma, wei ea as Polizeisiegl vo da Wohnungstia grissn hod; ea hod oba a Alibi fia de Zeit, wo da Moard gscheng is, und wead wieda freiglossn.
Bei da Obduktion kimmt außa, doss in da Kopfwundn Spuan vo Suiba san und a Hoiswiabl brocha is. De kriminoitechnische Untasuachung vo an Michael Leonberger sein LKW eagibt, doss sei Frau af da Lodefläch transpoatiat worn is. Aft wead da Spediteur in Untasuachungshoft gnumma.
Noch da Beeadigung van Opfa siagt da Benno Berghammer, doss de Muada vo da Erika Leonberger an Spaziastock mid an Suibaknauf hod, und sprichts draf o. Se legt a Gständnis ob; ois Grund gibts o, doss ia Tochta se ausglocht hod, wias iara wega da Scheidung ins Gwissn reden woit. Se häds oba ned umbringa woin.
Da Stootssekretär von Gluck bsuacht de Berghammerin in iara Pension und sogt, doss an Zuaschuss kriagt, se soid oba zu neamd wos song. Da Benno aißat große Bedenkn iba de Vagabepraxis bei Feadarungan und ko sei Muada davo ibazeing, doss am bessan draf vazicht.
Hintagrund Werkeln
Gfuimt worn is z Däiz, z Münsing (Kapej), z Fischbachau (Friedhof), z Dietramszell („Haus Berneck“) und z Benediktbeiern;[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz Werkeln
- Tod in Dessous in der Internet Movie Database (englisch)
- Tod in Dessous bei Fernsehserien.de
Beleg Werkeln
- ↑ Tod in Dessous – derbullevontoelz.de (Memento vom 29. Aprü 2016 im Internet Archive)
| Vorherige Foig 22. Feba 1998: Tod am Rosenmontag |
Episodnlistn | Nächste Foig 19. Aprui 1998: Tod eines Strohmanns |