Der Bulle von Tölz: Tod in der Walpurgisnacht
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Tod in der Walpurgisnacht |
| Produktionsland | Deitschland |
| Originalsproch | Deitsch/Boarisch |
| Läng | 89 Minutn |
| Oitasfreigob | FSK 6 |
| Einordnung | Staffel 3, Foig 6 18. Foig insgesamt |
| Easchdausstrohlung | 16. August 1998 auf Sat.1 |
| Stab | |
| Regie | Walter Bannert |
| Drahbuach | Franz Xaver Sengmüller |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Tod in der Walpurgisnacht is a deitscha Feansehfuim van Walter Bannert ausm Joar 1998 noch on Drahbuach van Franz Xaver Sengmüller. Es is de 18. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 16. August 1998 af Sat.1 ausgstroit worn.
Handlung Werkeln
Am Omd van 30. Aprui schafft d’Resi Berghammer iam Sohn Benno as Wegschliaßn vo de Goartnmebl, doss ned an Treim in da Walburgisnochd zun Opfa foin. Da Kommissar geht oba liaba schlofa, wei ea de Mebl scho ois kloana Bua schiach gfundn hod. Am nächstn Morgn sans wiakli vaschwundn, und d’Resi valongt, doss de Polizei si drum kimmat.
De Bewohna vo Untermachtlfing und Obermachtlfing pfleng an Brauch van gegnseitign Maibaam-Stejn in da Nocht zun 1. Mai. Bishea is ois guad gonga, oba desmoi wead am nächstn Morgn da Roman Kronsdorfer tod afgfundn. Es stejd si außa, doss ea zeascht ibafoarn und donn mid an Messa dastocha worn is.
De Kriminala Benno Berghammer und Sabrina Lorenz findn außa, doss da Florian Auracher, dea wo’s af de Julia Geisreiter obgseng hod, woahrscheinli fian Unfoi vaontwoatli is. Daweis an Auracher vahearn, taucht a junga Mo im Kommissariat af, dea wo sei Gwissn ealeichtan wui: Ea hod – mid an Florian Auracher ois Beifoara – an Roman Kronsdorfer aus Vaseng ibafoarn, und wia ea häd steng bleim woin, is eam da Auracher afn Gasfuaß naufgstieng. Da Florian Auracher ko de Foaraflucht jetzad neamma obstreidn, oba midm Moard wui ea nix z doa hom.
De Julia Geisreiter is de hoamliche Gliabte van Opfa – drum hoamli, wei eanare Famijn seit 100 Joar zstrittn san – eh kloar, doss koana neamma woaß, warum des aso is. Wia da Jacob Geisreiter eafoart, doss d’Julia van Roman schwonga is, wead ea granti, oba da Berghammer und de Lorenz hoidn eam sei gschlampads Vahäitnis mid da Frau van eifasichtign Hendlbroda Karl Ferstl vor; aft is ea gonz schnej stad.
Schliaßli grot da Großvoda van Opfa, da Pankraz Kronsdorfer, unta Vadocht, wei ea efta bei da Nocht umanondaschleicht. Ea gibt zua, doss ea sein Enkl dastocha hod. Ea sogt, doss ea eam so schwar valetzt afgfundn hod, doss ea eam „dalesn“ hod miassn. Untam Vorwand, doss ea no wos oziang wui, geht da oide Pankraz alloa ins Haus und wead kuaz draf dahängt afgfundn.
Wei de oidn Goartnmebl vo da Berghammerin neamma aftaucht san, schenkt da Benno iara grod a neie Garnitur zun Gebuatsdog.
Hintagrund Werkeln
Gfuimt worn is z Däiz, z Neifahrn („Gasthaus Geisreiter“ z Untermachtlfing) und z Dietramszell („Gasthaus Kronsdorfer“ z Obermachtlfing);[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz Werkeln
- Tod in der Walpurgisnacht in der Internet Movie Database (englisch)
- Tod in der Walpurgisnacht bei Fernsehserien.de
Beleg Werkeln
- ↑ Tod in der Walpurgisnacht – derbullevontoelz.de (Memento vom 29. Aprü 2016 im Internet Archive)
| Vorherige Foig 17. Mai 1998: Der Mistgabelmord |
Episodnlistn | Nächste Foig 22. Novemba 1998: Berg der Begierden |