Der Bulle von Tölz: Der Heiratskandidat
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Der Heiratskandidat |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 10, Foig 2 45. Foig insgesamt |
| Easchdausstrohlung | 29. Oktoba 2003 auf Sat.1 |
| Stab | |
| Regie | Wolfgang F. Henschel |
| Drahbuach | Andreas Föhr, Thomas Letocha |
| Produktion | Ernst von Theumer junior |
| Musi | Uli Kümpfel |
| Kamera | Thomas Schwan |
| Bsetzung | |
| |
Der Heiratskandidat is a deitscha Feansehfuim van Wolfgang F. Henschel ausm Joar 2003 noch on Drahbuach van Andreas Föhr und an Thomas Letocha. Es is de 45. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 29. Oktoba 2003 af Sat.1 ausgstroit worn.
Handlung
WerkelnA Fischa ziagt a Leich aus on See. Zeascht san olle Eamittla gschockt, wei da Tode wia da Benno Berghammer ausschaugt, oba donn steht dea af amoi hinta eana. De Sabrina Lorenz foid an vadutztn Kommissar ealeichtat umn Hois. Da Tode is da Enthüllungsjournalist Bertram Söllner.
Da Grichtsmedizina Dr. Sprung findt außa, doss an Bertram Söllner a Beruhigungsmittl in Form vo on Tee vaobreicht worn is. Af de Weis außa Gfecht gsetzt, is as Opfa on de Hoar unta Wossa zong und datränkt worn.
De Eamittlungan eagem, doss da Söllner vo ara Heiradsvamittlung mehrane Kontaktadressn vo Frauan kriagt hod; dea hods oba mid da Trei ned so eng gseng. Unta dena san de Heilignbuidl-Tandlarin Rita Wrobbel – a ehemolige Schnoin, wia da Söllner außagfundn hod – und de Woahrsogarin Martha Wunderlich; deara ia Auto hod da Fischa am See gseng. No a Vadächtiga is da Glasa Fritz Karner, dea wo af Kiachnfensta spezialisiat is, oba koane Afträg neamma kriagt, seit da Journalist iba Kiachndiabstäi van Karner gschriem hod.
Da Markus Söllner, da Bruada van Todn, sogt aus, doss da Bertram a goidene Rolex-Uhr bsessn hod, oba de is spualos vaschwundn. De Katja Flemisch – Loatarin vo da Heiradsvamittlung und Gspusi van Bauuntanehma Anton Rambold – hod de Uhr afm Klo vo da Partnavamittlung gfundn und ois Pfand eibhoidn, wei da Bertram Söllner mid de Zohlungan im Rickstond woar. Da Rambold is goar ned begeistat, doss ea jetzad a Beweismiddl in on Moardfoi in sein Bsitz hod. Ea bschliaßt kuazahond, doss ea de Uhr zun Schmian vo on hohen Beamtn vo da Stootskanzlei heanimmt; ea wui vo dem fian Bayerischn Verdienstorden vorgschlong wean.
Da Kommissar Berghammer und da Polizist Pfeiffer beobochtn an Glasa Karner, wia dea a Uhr ara ondan Peason ibagibt. Es is de Rolex van Todn. Da Beamte vo da Stootskanzlei woit de Uhr zu Gejd mocha lossn, ohne doss ebba eafoart, doss ea finanzielle Probleme hod.
De Woahrsogarin Martha Wunderlich lenkt ban Koartnleng und bei ara spiritistischn Sitzung midm Benno Berghammer de Spua af an Anton Rambold, und – do schau hea – es wead, im Goartn vo da Villa vagrom, unta ondam a Zigarettnetui gfunden, des wo an Todn gheart hod. Da Rambold wead festgnumma und ins Polizeigfängnis brocht. Trotzdem glam de Kriminala irgadwia ned, doss ea ra Mearda is, und stejn da Tippgebarin a Falle mid on ogeblichn Togebiachl, in dem wo da Bertram Söllner eitrong hom kannt, wea eam sein Tee vagift hod. De Martha Wunderlich foid draf nei. Se sogt, doss an Tee manipuliathod, dmid iam Gliabtn schlecht wead und se si um eam kimman ko.
De Rita Wrobbel und da Markus Söllner valiam si inanonda, wia ra oba ban Steban in de Untalong vo sein Bruada vo iara Vagongaheit eafoart, is ea ogfressn. De Wrobbel setzt eam oba unta Druck: Se hod am See gseng, wia ea mid sein Bruada gstriddn hod, und de Polizei woaß no nix davo. Aft setzt da Söllner de zwoa Gejdeitreiba, de wo eam scho a Zeidl bedrohan, af de Wrobbel o. Se soidn si um se kimman, dmids sei Eabe neamma gfährdn ko; donn kannt ea seine Schuidn zruckzoin. De Gejdeitreiba schlong de Frau in iam Lodn nieda und song an Söllner, doss se de Wrobbel in de Obbruchreife Kurklinik bringa wean. Da Söllner fiacht, doss de Heilignbuidl-Tandlarin tod sei kannt, und informiat de Polizei, de wo sofort ausruckt und de gfesslte und kneblte Rita Wrobbel außahoit. Bei deara Aktion wead da Polizist Pfeiffer valetzt; ea hod on Schuss obgfeiad und an Queaschläga ins Knia kriagt.
Wia außakimmt, doss da Markus Söllner as gonze Eabtei vo seine Ejtan on da Börse vaspekuliat hod und außadem bei on Kredithai Schuidn hod, grot aa ea unta Vadocht. De Rita Wrobbel sogt bei da Polizei aus, doss se am See de Söllner-Briada ban Streidn gseng hod. Schliaßli gibt da Markus Söllner zua, doss ea sein Bruada datränkt hod, wei ea no amoi eabn woit.
Af amoi foid de Kriminala ei, doss se im Eifa vo de Eamittlungan an Anton Rambold in Polizeigfängnis vagessn hom. Wias eam freilossn, droht ea mid ara Klog und wui midm Handy sein Anwoit oruafa. Oba wia da Benno Berghammer eam on de Rolex eainnat und eam vazejhd, doss de Stootskanzlei entschiedn hod, doss ea, da Rambold, an Bayerischen Verdienstorden kriang soi, steckt da Bauuntanehma s Handy wieda ei und moant, doss’s doh no a Grechtigkeit gibt.
Nemhandlung
WerkelnD’Resi Berghammer findt afm Speicha a vaguibts Schriftstickl, vafosst in Sütterlinschrift, des wo ia gstorbna Onkl Walter hintalossn hod. Hinta dem vablosstn Gschreibsl vamuats a Oart Schotzkoartn. Se probiat s Entziffan bei Sunnaliacht mid ara Lupm, midm Eagemnis, doss as Bladdl vakoit und de betreffade Textpassage vanicht wead. Aft losst de Berghammerin as Schriftstickl – ohne doss ia Sohn ebbs davo woaß – kriminoitechnisch untasuacha. S Eagebnis druckt da Dr. Sprung an Kommissar Berghammer in d’Hond. Dea is goar ned begeistat, doss sei Muada polizeiliche Eirichtungan fia private Zweck missbraucht.
As Lesboarmocha vo da Schrift bringt de Berghammerin ned weida, aa de Grobarei vo on Bekonntn im Goartn bringt nix. Wias oba eafoart, doss ia Bua bei seine Eamittlungan mid da Woahrsogarin Martha Wunderlich z doa hod, wuis grod mid deara Kontakt afnehma, do kimmt de vo sejba zua „Pension Resi“ und frogt nochm Benno. Dawei de zwoa midm gstorbnan Onkl in Kontakt tredn woin, plotzt da Kommissar in de Sitzung. A zwoata Vasuach geht aa danem, wei de zwoa Weiba dem sei oide Hittn ned finden, de wo in on Moor in da Jachenau steht. D’Resi Berghammer vasinkt im Sumpf und muass vo da Feiaweah außaghoid wean.
De Berghammerin foigt on Geistesblitz: Se reißt an Bredabodn in an Benno sein Schlofzimma af und hebt an „Schotz“. Es is a Oart Schatuin, de wo mid lauta Kramuri gfuid is. Da Kommissar moant dazua, doss da Onkl Walter no a kloana Bua gwen is, wo ea do gwohnt hod; außadem hod ea eh glei gseng, doss des a kindliche Hondschrift woar.
Hintagrund
WerkelnGfuimt worn is z Däiz und am Kirchsee z Sachsenkam. De neie Villa van Anton Rambold is im wiaklichn Lem as Vongna Schlos, des wo scho in Sturm der Liebe as „Hotel Fürstenhof“ woar;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
WerkelnDe Programmzeitschrift TV Spielfilm schreibt: „Nicht gerade rasant, aber schön schrullig.“[2]
Im Netz
Werkeln- Der Heiratskandidat in der Internet Movie Database (englisch)
- Der Heiratskandidat bei Fernsehserien.de
Beleg
Werkeln- ↑ Der Heiratskandidat – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Der Heiratskandidat – Filmkritik bei TV Spielfilm
| Vorherige Foig 15. Oktoba 2003: Strahlende Schönheit |
Episodnlistn | Nächste Foig 14. Jenna 2004: Süße Versuchung |