Der Bulle von Tölz: Süße Versuchung
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Süße Versuchung |
| Produktionsland | Deitschland |
| Originalsproch | Deitsch/Boarisch/Weanarisch |
| Läng | 90 Minutn |
| Oitasfreigob | FSK 12 |
| Einordnung | Staffel 10, Foig 3 46. Foig insgesamt |
| Easchdausstrohlung | 14. Jenna 2004 auf Sat.1 |
| Stab | |
| Regie | Werner Masten |
| Drahbuach | Ralph Werner |
| Produktion | Ernst von Theumer junior |
| Musi | Uli Kümpfel |
| Kamera | Rainer Lauter |
| Schnitt | Michael Breining |
| Bsetzung | |
| |
Süße Versuchung is a deitscha Feansehfuim van Werner Masten ausm Joar 2004 noch on Drahbuach van Ralph Werner. Es is de 46. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 14. Jenna 2004 af Sat.1 ausgstroit worn.
Handlung
WerkelnIn on Noblpuff stiabt a Kundschoft on gachn Tod; es is da Weihbischof Ferdinand Strobl. Wei da Betreiba, da Arno Aschauer, koan Zores mid da Polizei ned hom mechad, wui ea de Leich schnej loswean.
Da Prälat Hinter bsuacht d’Resi und an Benno Berghammer. Ea sommlt Untaschriftn dofia, doss da Biologielehra Anton Grill suspendiat wean soi, wei dea noch da Moanung vo vui gmoamitglieda duach sein vui z offnan Afklearungsuntaricht, und wei ea z vui sauft, untrogboar is. Da Kommissar fuid se ban Omdessn gstead und sogt zu seina Muada, doss gschiedne Leit san, wonns den Schmarrn do untaschreibt. Aft geht ea ins Wiatshaus, wei eam da Appetit vagonga is. Wia de Berghammerin drafhi an Prälatn zun Essn eilodt, kriagt dea on dringadn Oruaf und muass geh.
Wia da Arno Aschauer und dem sei a weng deppada Adlatus Charlie Meisriemel mid da Leich van Bischof im Koffaraum untawegs san, grodns in a Polizeikontroi, wei hintn rechts as Liacht ned geht. Da Polizist wui unbedingt on Blick in an Koffaraum weafa, do haut da Meisriemel eam mid on tedlichn Hondkantnschlog ins Gnack nieda.
Dawei de Kriminala Benno Berghammer und Sabrina Lorenz am nächstn Morgn an Fundort van umbrochtn Polizistn in Aungschei nehman, weans driba informiat, doss afm Monna-Haisl vo ara Autobahnraststätte a zwoate Leich gfundn worn is. Da Grichtsmedizina Dr. Robert Sprung findt außa, doss da Unbekannte on Heazvasong gstorbn is. Vor sein Tod hod ea a Potenzmittl eignumma, und gschnaxlt hoda raa. Außadem hoda ra opulents Essn eignumma ghobt.
D’Resi Berghammer dakennt af on Foto van Todn ohne Zweife an Weihbischof Ferdinand Strobl wieda. Da Dr. Sprung untasuacht no amoi as Bluad van Todn, midm Eagebnis, doss da Bischof mid Digitalis vagift worn is, des wo woahrscheinli iba ra präpariate Kapsl vaobreicht worn is. Da Prälat Hinter moant, doss da Lehra Anton Grill fia de Tat in Frog kimmt, wei dea in letzta Zeit on pathologischn Hoss gega ois Kiachliche entwicklt hod.
Da Lehra Grill sogt aus, doss de Kampagne gega eam bloß a Vorwand is, wei ea on 16-jährign Schuimadl zun Schwongaschoftsobbruch grodn hod. Midm Weihbischof wui ea a klearends Gspräch gfiahtd hom, und dea soi zwengs da Suspendiarung eiglenkt hom.
Da Pater Matthias hod gseng, wia da Weihbischof am Voromd vo ara weißn Stretch-Limousine mid dunkle Scheim obghoit worn is; Markn und Kennzoachn woaß ea olladings ned. De Kommissarin Lorenz findt oba gschwind außa, doss da Wong an Puffbsitza Arno Aschauer gheard. Oba dea wui an Weihbischof ned kennt hom.
A Motiv hod aa da Hans Prantner, dea wo de Spendnkontn vo sein Varein zun Spekulian obgramt hod und drum on Bsuach van Weihbischof kriagt hod. Ois Heilpraktika und Osteopath hod ea s nedige Wissn – aa wia ma ra Gnack bricht.
Wia da Anton Grill dalem muass, doss ea wegan Valust vo sein Orbatsblotz vo da Bank koa Gejd neamma kriagt, und ban Prälatn Hinter obblitzt, dea wo si fias Rickgängimocha vo da Suspendiarung eisetzn soid, draht da Lehra duach und drängt s Foarzeig van Prälatn vo da Stroß ob. Im Auto sitzt olladings ned da Hinter, sondan da Pater Matthias, dea wo valetzt ins Kranknhaus brocht wean muass.
De Victoria Zechmeister, a Schnoin ausm Noblpuff, quartiat si in da „Pension Resi“ ei und gibt si ois Stijberodarin aus. Se soi im Aftrog van Arno Aschauer an Benno Berghammer ogrom und eam mid kompromittiarende Buidln eapressboar mocha. D’Resi Berghammer wui a weng nochhejfa, wei ia des fesche Madl gfoid, ia Bua oba gschami duad. Se kaft a Parfum und deponiat’s zammad mid on Kartl mid gfejschta Untaschrift im Gostzimma vo da Victoria. Da Kommissar is ibahapts ned begeistat, wia d’Victoria si bedankt.
Wia si außastejd, doss da Anton Grill si goar ned im Guadn van Weihbischof vaobschiedt, sondan a lautstoarke Ausanondasetzung mid eam ghobt hod, foarn de Kriminala zun Lehra hoam. Wei dea ned afmocht, bricht da berghammer de Tia af. Da Grill hoid si a Pistoin on Schädl und wui si daschiaßn, oba ea daboggt’s ned.
Dawei dagibt de Ausweatung vo de Spuan am Fundort van umbrochtn Polizistn, doss de DNS om Zigarillofuita identisch mid deara is, de wo om Fuita woar, den wo da Charlie Meisriemel vor de Aung vo da Kommissarin weggagschmissn hod. Und wei da Meisriemel aa no Kampfsportla is, wead ea festgnumma.
Wia de Kommissar an Arno Aschauer afsuacha woin, wei in sein Jaguar Fasaspuan vo an Weihbischof sein Gwand gfundn worn san, findns an Puffbsitza daschossn in sein Büro; de Tatwoffn liegt danem. Da Benno Berghammer riacht ban Todn s gleiche Parfum, des wo sei Muada fia d’Victoria Zechmeister kafft hod, und eam wead kloar, wea de Tat begonga hod. Bei da Befrogung van Peasonal siagt da Berghammer bei da Leila, de wo imma an Bischof bedeant hod, a Schochtl mit Kiaschwossapralina. Soichane hod ma raa im Mong van Bischof gfundn.
De Victoria Zechmeister is vaschwundn, oba weis an Kommissar vo de Kapverdischn Insln vorgschwärmt hod, pressiad ea zun Flughofm, wo ea se wiakli findt. Se gibt zua, doss an Arno Aschauer umbrocht hod, wei ea se wia Dreck behandlt hod. Se woit ia Nebnbuhlarin loswean. Se woar si sicha, doss’s nua de Leila dawischn ko, weis de Pralina praktisch imma sejba gessn hod.
Dawei hod da Charlie Meisriemel on Polizistn austrickst und a Auto gstoin. Wia de Kommissarin Lorenz eam stoppt und zun Aussteing affordad, gibt dea Voigas und vawandlt an Wong in on Schrotthaffa.
D’Resi Berghammer lodt an Prälatn Hinter zu Kaffee und Kuacha ei; aa de Kommissar san do. Se schlong eam vor, doss ea de Ozoag gegan Anton Grill zruckziagt. Außadem soid ea af d’Schuiloatung eiwiaka, doss de Suspendiarung afghom wead. Im Gengzug dadns dafia sorgn, doss de woahrn Todesumständ van Bischof ned ons Liacht kemman. Noch kuazn Ibaleng moant da Prälat, doss des a guads Ogebot is.
Hintagrund
WerkelnGfuimt worn is z Däiz und af da Autobahnraststätte „Höhenrain“ on da A95 bei Berg (Fundort vo da Leich);[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
WerkelnDe Programmzeitschrift TV Spielfilm schreibt: „Launig: Benno macht den Klerikern Beine.“[2]
Im Netz
Werkeln- Süße Versuchung in der Internet Movie Database (englisch)
- Süße Versuchung bei Fernsehserien.de
Beleg
Werkeln- ↑ Süße Versuchung – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Süße Versuchung – Filmkritik bei TV Spielfilm
| Vorherige Foig 29. Oktoba 2003: Der Heiratskandidat |
Episodnlistn | Nächste Foig 11. Feba 2004: Sport ist Mord |