Der Bulle von Tölz: Sport ist Mord
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Sport ist Mord |
| Produktionsland | Deitschland |
| Originalsproch | Deitsch/Boarisch |
| Läng | 92 Minutn |
| Oitasfreigob | FSK 12 |
| Einordnung | Staffel 10, Foig 4 47. Foig insgesamt |
| Easchdausstrohlung | 11. Feba 2004 auf Sat.1 |
| Stab | |
| Regie | Werner Masten |
| Drahbuach | Franz Xaver Sengmüller |
| Produktion | Ernst von Theumer junior |
| Musi | Uli Kümpfel |
| Kamera | Rainer Lauter |
| Schnitt | Michael Breining |
| Bsetzung | |
| |
Sport ist Mord is a deitscha Feansehfuim van Werner Masten ausm Joar 2004 noch on Drahbuach van Franz Xaver Sengmüller. Es is de 47. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 11. Feba 2004 af Sat.1 ausgstroit worn.
Handlung Werkeln
D’Resi Berghammer foart mitm Fanclub vo da Däiza Bobpilotin Evelyn Bergham, den wo da Busuntanehma Clemens Kirchhofer af d’Fiaß gstejd hod, af Berchtsgoan zua Wejtmoastaschoft. Ia Sohn Benno vaschweigt ia, doss ea raa dorthi foart; ea wui mid sein ehemolign Lehrmoasta Rudolf Schenkmeier, an Loata vo da Berchtsgoana Polizeiinspektion, dem sei boidige Pensionierung feian.
Ban obschlusstraining wead da Bob vo da Evelyn Bergham sabotiat. De WM-Favoritin und ia Bremsarin ibastengan an Unfoi nua mid vui Glick unvaletzt. Da Bobvaband wui koane negativn Schlogzein ned provozian, aa wui ea de Investitionsbereitschoft van Bauunternehma Anton Rambold und van Stootssekretär Berthold von Gluck ned gfährdn, oiso wead da Zwischnfoi ois technischa Defekt higstejd.
Nochdem da Benno Berghammer und da Rudolf Schenkmeier ausgiebi gsoffa hom, rodt da Benno sein Kollegn, ea soid mid on Taxi hoamfoarn, und ziagt si in sei Hotej zruck.
Am nächstn Morgn findt de Physiotherapeutin Dr. Zwingmann bei iam obligatorischn Woidlaf d’Evelyn Bergham dawiagt af. Mehrane Knochabrich deitn draf hi, doss as Opfa ibafoarn worn is. De Hauptkommissarin Barbara Götze vo da Kriminoipolizei Traunstoa is fian Foi zuaständi. Da Polizeichef Rudolf Schenkmeier, dea wo scho seit 20 Joar draf woart, doss ea bei da Afklearung vo on Moardfoi mitorbatn deaf, bitt an Benno Berghammer um Untastitzung.
Af on Video van Trainings siagt ma, wia da Robert Lortz, da Betreia van Team Deutschland II, on Inbusschlüssel ausm Bremssystem vo da Evelyn Bergham iam Bob ziagt und weggaschmeißt. Wia de Kriminala an Lortz afsuacha woin, kimmt grod de Dr. Zwingmann aus sein Haus. Im Karton, wo se dabei hod, san Dopingmittl. Se gibt zua, doss ons große Gejd kemma woit, oba midm Moard wuis nix z doa hom. Aa da Lortz streit de Tat ob, gibt oba zua, doss ea de Foararin van Team Deutschland III dafia zoid hod, doss de Bremsn vo da Evelyn Bergham ian Bob manipuliat, dmid de Favoritin on gscheidn Schreck kriagt.
Da Clemens Kirchhofer vazejhd da Resi Berghammer, doss ea in da Friah bei da Tankstej sein Bus gwoschn und on Jeep gseng hod, wia dea in Woid gfoarn und kuaz draf zruckkemma is; s Kennzoachn woaß ea olladings ned. De Berghammerin vaspricht eam, doss ian Sohn so boid wia megli driba informian wead, oba se losst mehrane Glengheitn dazua vastreichn, weis außafindt, wem des Foarzeig gheard. Eascht af da Hoamfoart ruckt se’s außa und gibt ois Grund fia ia Zegan o, doss se’s bishea ned ibas Heaz brocht hod, sein Freund Schenkmeier hizhänga. Noch iara Moanung hod da oide Polizist de Soch sejba in d’Hond gnumma, dmid ea doh no on Moard beorbatn ko. Da Kommissar draht sofort um und stejd eam zua Red. Da Schenkmeier vazejhd eam drenzad, doss ea nua an Jeep zuasperrn und a Taxi ruafa woid, oba donn is eam so schwindli worn, doss ea si fia on Moment ins Auto setzen woit. Do is ea eigschlofn und eascht in da Morgndämmarung wieda afgwocht. Donn hoda ra leblose Peason vor seim Jeep lieng gseng und gfiacht, doss ea se im Suff ibafoarn hod. Eascht ban Auslodn vo da Leich dan eam de Wiagmoi am Hois afgfoin.
Wian Rudolf Schenkmeier a weng spada eifoid, doss da Clemens Kirchhofer eam vo deara Tankstej aus goar ned gseng hom ko, wei ea sejba on Schleichweg gnumma hod, wead an Benno Berghammer kloar, warum da Kirchhofer sei Beobochtung da Polizei vaschwiegn hod. Außadem deafad da Kirchhofer an Schenkhmeier afm Hotejparkblotz ban Obtransport vo da Leich gseng hom. Da Kommissar suacht sei Kollegin Götze af, de wo grod Beweise gega ian Haptvadächtign, an Bobbauer Markus Hirschbichler, sammlt. Iara Moanung noch hoda ra stoarks Motiv, wei d’Evelyn Bergham sein Ruhm duach ian Wechsl zu on ondan Heasteja zasteart hod. Da Berghammer ko de Götze oba trotzdem vo sein Vadocht gegan Kirchhofer ibazeing. De Kommissar findn eam in an Markus Hirschbichler seina Weakstott vor, wo ea grod an betaibtn Bobbauer mid on Strick umn Hois in d’Heh kuablt. An Kirchhofer sei Plan woar, doss’s aso ausschaugt, wia wonn da Hirschbichler sejba woit, doss da Boandlkrama eam midm Lasso obhoit. Noch da Kommissarin Götze iara Affordarung losst da Kirchhofer eam wieda oba. Af an Hirschbichler sein Computa steht a obschiedsbriaf mid da Begrindung, doss ea si da Vahoftung entziang woit. Da Clemens Kirchhofer sogt aus, doss ea in on Wiatshaus ghead hod, doss da Hirschbichler vadächtigt wead. Ois Motiv gibt ea o, doss d’Evelyn Bergham eam ois Manager obglahnt hod, obwoi ea seit da easchtn Stund on ia Potenzial glabt hod. Se hod iare Erfoige ohne eam gniaßn woin.
Da Stootssekretär Berthold von Gluck und da Bauuntanehma Anton Rambold wean af a Foart midm Bob eiglodn. Wei de zwoa an Benno Berghammer scho efta ozipft hom, nutzt ea de Glengheit und manipuliat de Bremsn. Wo ea an Inbusschlissl neistecka muass, hoda jo afm Trainingsvideo gseng. De Großkopfadn ibastengan an Unfoi unvaletzt. Da Rambold kriagt on cholerischn Ofoi; ea ko si denga, wea eam den Hund neighaut hod.
Hintagrund Werkeln
Gfuimt worn is z Däiz, z Berchtsgoan und z Scheenau am Kenigssää (Kunsteisbahn);[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz Werkeln
- Sport ist Mord in der Internet Movie Database (englisch)
- Sport ist Mord bei Fernsehserien.de
Beleg Werkeln
- ↑ Sport ist Mord – derbullevontoelz.de (Memento vom 29. Aprü 2016 im Internet Archive)
| Vorherige Foig 14. Jenna 2004: Süße Versuchung |
Episodnlistn | Nächste Foig 17. Meaz 2004: Krieg der Sterne |