Làdina

Der Artikl is im Dialekt Stod-Soizburgarisch gschriem worn.

D' Ladina san a romanischs Voik vo ebba 35.000 Leit, des wo im Noadn vo Italien, in Sidtiroi, östlich vo Bozn (Gada- und Grödnatoi), im Trentino (Fassatoi) und in da Prowinz Belluno (Buachnstoa und Cortina d' Ampezzo) leebt. D' Ladina hom eana eigne Sproch, de Ladinisch gnounnt wead, de in fünf vaschiedane Idiome gsprochn und gschriem wead. Im Kuiturbereich wern vaschiedne ladinische Haustipm untaschiedn. D' Ladina stöin knobbe viar Prozent vo da Bevökarung vo Sidtiroi dor.

Ladina
D' fümf ladinischn Täla in Sidtiroi, Trentino und Belluno
Bevökarungszoih:	uma 35.000
Signifikante Bevökarungszoihn:	Sidtiroi Trentino Prowinz Belluno
Sprochn:	Ladinisch, Deitsch, Italienisch

Wia bei oundare Vöika hod se a bei d' Ladina a ethnischs Nazionalbewusstsein im 19. Joahundat entwigget, wobei Micura de Rü an easchtn Vasuach untanumma hod, a ladinische Schriftsproch z' entwiggen. Haid wead d' ladinische Kuitur unta oundam in dem noch Micura de Rü benounntn ladinischn Kuiturinstitut in St. Martin in Thurn pflegt. Im gleichn Ort befindt se a a ladinischs Museum.

Vüi vo d' südtirola Song stoumman aus 'm ladinischn Raum, so wia as Nazionalepos vo d' Ladina vom Reich vo d' Fanes. Weidare Figurn aus da ladinischn Mithologie san beispüisweis d' „Anguana“.

Kuiturinstitute

D' inofizielle Fahne vo Ladinien

Oundare Kuiturinstitute wia as Istitut Ladin Mercura de Rü san unta oundam:

• As Istitut Cultural Ladin „Cesa de Jan“ z' Verseil/Col (Santa Lizia)/Colla Santa Lucia

(Idiome: Ampezzo/Ampezzanisch, Col, Fodom/Buachnstoanarisch)

• As Istitut Cultural Ladin „Majon de Fascegn“ z' Vig im Fassatoi/Vich (de Fascia)/Vigo di Fassa

(Idiom: Fascian/Fassanisch)

• As Istito Ladin de la Dolomites z' Borcia/Borca di Cadore

(Idiom: Cadorino)

Gschicht

15. v. Kr. wead da Oipmraum vo d' Röma erobat. D' Oipmbevökarung de hauptsächlich aus Räta bestoundn is, üwanimmt d' lateinische Sproch, de se untam Eifluss vo d' hoamischn Sprochn zum ladinischn (Rätoromanischn) gwoundlt hod. Es wead vüifoch d' Meinung vatretn, dass d' Röma se ned fir d' Seitntäla intaressiart hättn und dass de stete Besiedlung durch d' romanisiarte Bevökarung in de Täla eascht spada stottgfundn hätt. Funde vo Münzn und Gengständ (u. oundam a Woog) in d' ladinischn Täla widasprechn owa dera Ousicht. De Täla san domois scho bereits druchgehnd besiedlt gwesn.

Friarare Sprochraum

Infoige vom Vurdringa vo d' Bajuwarn und Alemannen aus 'm Noadn und vo d' Langobardn aus 'm Siidn sowia da Slawn aus 'm Ostn wead as ladinische Gebiet (s hod vom Gotthard und Bodnsee bis zur Adria greicht) noch und noch varingat und aufgsplittat. Es bleim voanounda trennte Sprochinsln. In de foingndn Joahundate san de weida gschrumpft. Umara 600 n. Kr. hom d' Bajuwarn Bozn eignumma. 800 n. Kr. san s oware Eisoggtoi und d' Bozna Gengd no zwasprochig. Restln vo da Ladinischn Bevökarung hoitn se no in Rengschburg, Soizburg und Minga. Umara 1000 is da gsoumte Kanton Graubündn no Romanisch.

Umara 1200 redn bereits za. zwa drittl vo de Leit imheitingSidtiroi bereits Deitsch. Zu dera Zeid san ned nur as heidige Ladinien no ladinisch sondan a no Vilnöss, Kastlruth, Völs, Tiers, Aua sowia da Vinschgau.

Zum Beginn vom 17. Joahundat hod ma in da Kastlrutha Frakzion St. Michael no Ladinisch gredt, wia eemso in Wöischnofn (Welschnofen/Neva Ladinia). Ladinisch san a as Fleimstoi, Cadore, Zoldo, Agordo, da oware Vinschgau (wöicha im 17. Joahundat mid am Vabot vom Ladinischn germanisiart worn is. Jenseits vo da nohn Grenz in Müstair redt ma heid no Romanisch) gwesn.

Faschismus

1919 is Ladinien zoumm mid Sidtiroi zu Italien kemma. D' Ladina hom an Vableib dei Tiroi und bei Östareich gfordat und de Ouerkennung ois ethnische Mindaheit (de unta Östareich-Ungarn ned gewährt worn is), d' politische Autonomie sowia 'n Schutz vo da Ladinischn Sproch.

Da Faschismus in Italien hod Ladinisch zum italienischn Dialekt erklärt, obwoih de Theorie ned d' sprochwissnschoftlichn Forschungen entsprochn hod. Mid dera Theorie san a Gebietsousprüche vo Italien gengüwa da Schweiz vabundn gwesn: Da Tessin, sowia d' italienischsproching und rätoromanischsproching Teile vo Graubündn hättn somid zu Italien ghert. In dera Zeid (1938) hod Schweiza Bevökarung mid oana üwawöitigndn Meaheit Rätoromanisch ois viarte Loundessproch ouerkounnt und somit a deitlichs Zeichn gengüwa Italien gsetzt.

Bei am Treffm vo Ladinavatretan 1920 is d' ladinische Fahne entstoundn: „Blau firn Himme, Weis fir d' schneebedeggtn Berg, Greoa fir d' Wiesn in da Dolomitnloundschoft“

1923 is Ladinien vo d' Faschistn dreiteilt worn: Anpezo und Fodom mid Col san zur Prowinz Belluno kemma, 1927 is Gada- (Val Badia) und Grödnatoi (Gherdëina) zur nei gschoffanen Prowinz Bozn kemma und Fassatoi (Fascia) is bei da Prowinz Treant bliem. s erklärte Züi vo da Dreiteilung is d' rosche Assimiliarung vo d' Ladina gwesn. D' Dreiteilung is noch 'm Faschismus ned rüggängig gmocht worn und heid no aufrecht. 1946 san d' Grenzn vo de Diözesn oun d' Dreiteilung ouglichn worn.

1939 wern d' Ladina vo da Prowinz Bozn und Belluno ois fremdstämmig eigstuft und miassn optiarn, obwoih da Faschismus d' Ladina offiziell ois Italiena eigstuft hod.

Noch 1945 bis heid

Runde Dreitausnd Ladina hom 1946 am Sella-Joch geng d' Dreiteilung vo Ladinien demonstriart und hom mehr Rechte fir d' Mindaheit gfordat. De Rechte san greestnteils bis heid no ned gewährt worn und de Dreiteilung vo d' Ladina besteht bis heid no. In da Prowinz Trento sowia in da Prowinz Belluno is d' rein italienische Schui wieda eigfihrt worn. In de ladinischn Täla vo Sidtiroi hod s Vasuache gem, a rein deitsche Schui eizfihrn.

1948 is mid am Dekret vom Untarichtsminista d' paritätische Schui in d' ladinischn Täla vo Sidtiroi eigfihrt worn. Fanatische Familien hom eanare Kinda währnd 'm Ladinischuntaricht aus d' Schuin obzong. D' vureascht ungwohnte paritätische Schui is vo da Bevökarung dounn greestnteils akzeptiart worn. Vasuache d' Schui weida z' germanisiarn hod s weidahi gem.

1950 schliassn se d' ladinischn Vareine zua Union Generala di Ladins dla Dolomites ois Dochorganisazion fir olle Dolomitnladina zoumm. D' Organisazion wead vo d' jeweiling Meaheitn in d' Prowinzn ougfeindet. Nur Rom akzeptiart d' Union Generala ois Vahoundlungspartna. Vüi Errungenschoftn vo d' Ladina in d' letztn Joazeente gengan auf d' Bemühungen vo da Union zrugg.

1964 wüi Rom d' Ladina an eignen Woihkreis gem. Des Recht wead owa vo Bozn vahindat.

In d' 70a Joa vasuacht d' Meaheit in Sidtiroi, rein deitsche Schuin in Ladinien eizfihrn. s Vafossungsgricht stopt 'n Assimiliarungsvasuach schliasslich 1976.

1975: Grindung vom Istitut Cultural Ladin "Majon di Fascegn" sowia vom Ladinischn Schuioumt (Bozen).

1976 Grindung vom Istitut Cultural Ladin "Micurà de Rü" (San Martin de Tor).

1977 erhoitn d' Ladina im Fassatoi eana territorale Ounerkennung.

1989 wead as Vawoitungsgricht in Bozn eröffnet. Obwoih s a üwa d' Gleichbehoundlung vo da ladinischn Sprochgrubbm z' urteiln hod, san d' Ladina aus 'm Vawoitungsgricht gsetzlich ausgschlossn.

Auf Betreim vo da Union Generala wead Ladinisch Vawoitungssproch in d' ladinischn Gmoana in Sidtiroi. Aussahoib vo de Gmoana miassn d' Ladina zwischn Deitsch und Italienisch wöihn.

1993 wead Ladinisch Vawoitungssproch im Fassatoi.

1993 is a politische Partei vo d' Ladina gründt worn, de „Ladins“. Für zwa Legislaturperiodn hod d' Listn Ladins mid 'm Carlo Willeit 'n ladinischn Loundtogsobgordetn gstöid.

D' Merheit im Regionalrod beschliasst a Woihgsetz, des mid oana Speaklausl autonome politische Partein vo d' Ladina de fakto vabiatt bzw. aus 'm Regionalrod ausschliasst. Des Gsetz wead no im gleichn Joa noch am Rekurs vom ladinischn Obgeordentn im Regionalrod vom Vafossungsgricht in Rom ois vafossungswiedrig weil mindaheitnfeindlich annuliart.

Mid 2000 hod s a Obändarung vom Autonomiestatus gem, wo d' Ladina d' Meglichkeit erhoitn hom in da Loundesregiarung vatretn sei z' kenna, owa nur wounn d' Meaheit eivastoundn is.

2003 wead da Mussner Florian ois oanziga Ladina in 'n Loundtog gwöiht, d' Listn Ladins valiart eana Mandat.

2003 wead mid am Beschluss vo da Loundesregiarung d' ladinische Schriftsproch Ladin standard in da öffmtlichn Vawoitung voreascht ned zuaglossn.

Ladinische Gmoana

Boarischa Noum	Ladinischa Noum	Italienischa Noum	Prowinz	Flächn in km²	Eihwohna
Haidn	Anpezo	Cortina d'Ampezzo	Belluno	255	6.150
St. Ulrich in Gröden	Urtijëi	Ortisei	Sidtiroi	24	4.569
Obtei	Badia	Badia	Sidtiroi	82	3.237
Enneberg	Mareo	Marebbe	Sidtiroi	161	2.684
Moena	Moena	Moena	Treant	82	2.628
Woiknstoa in Grödn	Sëlva	Selva di Val Gardena	Sidtiroi	53	2.589
Potzoch im Fassatoi	Poza	Pozza di Fassa	Treant	73	1.983
Kanzenei	Cianacei	Canazei	Treant	67	1.844
St. Kristina in Grödn	S. Crestina-Gherdëina	Santa Cristina Valgardena	Sidtiroi	31	1.840
St. Martin in Thurn	San Martin de Tor	San Martino in Badia	Sidtiroi	76	1.727
Buachnstoa	Fodom	Livinallongo del Col di Lana	Belluno	99	1.436
Kurfar	Corvara	Corvara	Sidtiroi	42	1.266
Wengen	La Val	La Valle	Sidtiroi	39	1.251
Låg	Låg	Laghetti	Sidtiroi	23	1,284
Wig im Fassatoi	Vich	Vigo di Fassa	Treant	26	1.142
Kampidel im Fassatoi	Ciampedèl	Campitello di Fassa	Treant	25	732
Üwawossa	Sorèga	Soraga	Treant	19	677
Mazzin	Mazin	Mazzin	Treant	23	440
Werseil	Col	Colle Santa Lucia	Belluno	15	418

Schui

Sidtiroi

In Sidtiroi gibt s d' paritätische Schui: des hast, dass in da easchtn Klass Voiksschui Italienisch und Ladinisch oda Deitsch und Ladinisch untarichtt wead. In d' oundan Klassn vo da Pflichtschui wead d' Höiftn vo d' Fächa auf Deitsch, d' oundare Höiftn auf Italienisch untarichtt. Fir Ladinisch bleibt somid nur a winzige Eggn übrig: des hast, dass in da Pflichtschui zwa Wochnstundn und in da Owaschui oa oanzige Stund auf Ladinisch untarichtt wead.

D' Regelung güit nur fir d' Schuin in d' ladinischn Täla, oiso s Val Badia (Gadatoi) und Gherdëina (Grödnatoi); aussahoib gibt s koa Meglichkeit, Ladinisch z' lerna. Mearare Owaschuitipm gibt s ned in d' ladinischn Täla. In de Schuitipm wead d' Ladina an Muadasprochuntaricht prinzipiell ned ermeglicht. Durch d' Ouhewung vo da Pflichtschui miassn vüi Ladina eana letzts Joa aussahoib vo eanam Toi bsuachn und somid da minimale Muadasprochnuntaricht in da Pflichtschui ned garantiart.

Prowinz Treant

Ladinisch is in d' Schuin dalaubt, sowoih ois Untarichtsfoch ois wia a ois Untarichtssproch (seid 1993). In da Praxis beschränkt se da Untaricht owa derzeid auf oa Wochnstund Ladinisch und oa oda zwa Stundn Untaricht auf Ladinisch in d' Pflichtschuin.

Prowinz Belluno

Koa Ladinischuntaricht in d' Schuin.

Galerie

• 
  Ladinische Bauanhef z Wengen/La Val
• 
  Schloss Thurn in de 1960a Joar
• 
  Tavella und Lunz z Wengen
• 
  Pfliagn z Wengen untahoib „Campo“, heit „Cians“

Beleg

• www.vejin.com - (Info iwa d Ladina)

Literatua

• Caius Perathoner, Adolf Andreas Kostner: Ladinisches Vermächtnis. Natur - Mythos - Bauernkultur in den Dolomiten. Athesiadruck Bozen 1984.
• Bepe Richebuono: Kurzgefasste Geschichte der Dolomitenladiner. Institut Cultural Ladin, 1993

Im Netz

• Constanze Kindel: Ladinisch für Anfänger. DIE ZEIT 4/2006.