Boarische Wikipedia

Nutza:Luki/Itzcoatl

< Nutza:Luki
Der Artikl is im Dialekt Owaöstareichisch gschriem worn.
Itzcoatl
Itzcoatl
Bronzestatue vom Itzcoatl in da Stod Mexiko
Herrschadatn
Titl 5. Tlahtoani vo Tenochtitlan
Herrscha da Mexi`ca vom Aztekn-Dreibund
Herrschofd 1427 –1440
Reich Mexi`ca---Aztekn-Dreibund
Vuagänga Chimalpopoca
Nochfoiga Ilhuicamina-Moteuczuma I
Lemsdatn
Glebt vo uma 1380?/1382 - 1440
Gebuan in Tenochtitlan, Tenochtitlan- Mexica
Eheweib Kenigin Huacaltzintli (aus Tlatilolko)
Vota Acamapichtli
Muada Matlalxochtzin? Tepanekn Weiwal vo Azcapotzalco



Da Itzcoatl is umma 1382 ois Suhn vom Tlahtoani Acamapichtli af de Wöd kema. Sei Muadda soid a Kebsweiwal (Sklavin) aus da Tepaneknhaubdtschtod Azcapotzalco gwest sei. Unta seine Briada und Viagenga hod as bis zan Tlacateccatl brocht (owasta Heerfiara). Des woa domois da zweitwichtigste Raung bei de Mexica. Ois bei de Tepanekn da Taxtla an de Mocht kema is hobm de Mexica gneist, das a iazt gegn eahna gehad wead. Oiso hobms an kriagseafoahna Mau an da Schpitzn braucht und so is da Itzcoatl zan Tlahtoani (Fiascht-Kini) eahobm wuan. Unta eahm und mid da Untaschtitzung vom Nezahualcoyotl und seine Auhenga und a da Hüf vo nu a boa aundare Schtodschtootn hobms de Tepanekn gschlogn. Nochm Sieg woa a Ana vo de Mitgründa vom Aztekn-Dreibund. Nochm Sieg hod a aa de mexicanische Gsöschoft und a iahr Vuagschicht gänzli umkrempöd. Ea güt ois da Begründa vom Schtoot vo de Mexica, de ma heid fölschli de Aztekn nennt. Umma 1440 is a vaschtuarm.

Seine Afäng

Werkeln

Sei Vota woa da Tlahtoani Acamapichtli und bei de Kinda is fia de Legetimität nua de Votalinie zuaschtendi gwest. Obwoi sei Muadda vamuatli nua a Kebsweiwal und a Sklavin aus Azcapotzaco woa, hod des Biabal voi za da Famülie ghead.

 
Genealogie vo da Heaschafamiüli vo Tenochtitlan (ogrunda Rauhman = Weiwal). Rosa: Tlathoque, violett: Cihuacoatl, gelb: kolonialzeitlige Tlathoque aus da Heaschafamüli. Vawaundtschoftsbzoachnungan zu aundane Oat: AZ = Azcapotzalco, TE = Tetzcoco, TL = Tlatelolco
  • Ea is afm Naum Itzcoatl tauft wuan und dea hod in da Nahuaschproch bedeit: Obsidianschlaung, aus de Wuat, Itztli = Obsidian-Messa und Coatl = Schlaung = Itzcōhuātl, [it͡sko ː a ː t͡ɬ]. In Mesoamerica hod ma jo koa Eisn kennt und dahea woa da Obsidian, des Eisn vo Mesoamerika des hiataste Materieu des ma kend hod.

Es hod owa do nu a Wengl mera zöht, waun de Muadda a Prinzessin aus an Heaschafamülie heakema is. Und in da domolign Zeid nu mera wauns da machtign Famülie da Tepaneknherrscha zuaghead hod.

Sei Ausbüdung

Werkeln

Ois a Prinz aus da Heaschafamülie hod a a guade Ausbüdung kriagt, a za an owan Priesta is a ausbüt wuan. In da mülitarischn Hiararchie is a schnö afgschtign. Unta seine jingan Briada hod a en Owabeföh iwa de Kriaga ghobd. Ois da Tlacateccatl, des woa da zweithechste Postn bei de Mexica. Und da sei Voik domois jo de Tepanekn tributpflichti woa, de owa eahna Kaumpfkroft gschezt hobm, hod a kriagsmaßi gnua leana und oschaun kena.

  • Ea hod mid seine Mexica-Regimenta mera Eaowarungszüg, unta de Tepanekn duachgfiad. Bis weid in Nuadn affi.
  • Se hobm owa a alloani fia de Tepanekn Schtodschtootn eaowan deaffa. Wia em Schtoot vo de Xaltocana, mid eahnana Haubdtschtod im nuadlign Texcocosee.
  • A bei de Kriagszüg gegn de Acolhua san de Mexica vo Tlaltilolco und vo Tenochtitlan ois de Kettnhund vo de Tepanekn viagschickt woan.
  • So hod da Itzcoatl a guade Kriagsschui duachgmocht und hod se a guad gmeakt wias kaumpfmaßi bei de Tepanekn zuagaunga is.
  • Es hod owa scho a Wengl an Miasmuad bei de Tepanekn iwa de Mexica gebm. Weu ois de Teotihuacan-Mexica untam Chimalpopoca gegn em Schtootnbund vo de Chalca Kriag gfiad hobm, de aa Vasalln vo de Tepanekn woan, san De vo de Dene intaschtizt woan. Ois wia wauns de Mexica zoagn woitn, das eahnane Baam ned in Hümmi woxn deafan.

Wia se de Log zuagschpizt hod

Werkeln
 
De Herrschaglyphn vom Itzcoatl, ausm Kodex Mendoca.

Ois da lezte Tlahtoani vo de Tenochtitlan Mexica, da Chimalpopoca 1426 a so a unrühmligs End gnumma und se de bolitische Log fia eahna zuagschpizt hod, woa da Itzcoatl dea oanzig Augsegne aus da Herrschafamülie, mid da Beföhsgewoit iwa eahna Mülitäa.

  • Oiso hod da Itzcoatl de Schtootsgscheft weidagfiad.
  • Da neiche Tepanekn -Herrscha, da Maxtla, hod in seim Reich augfaungt, de eahm unliabsauma Herrscha auszschoitn (Umzbringa). Des is ois des Kinischteam iwaliefat.
  • Des Voik vo Tenochtitlan woa gschpoitn. De Odlign hobm se afs Kriagfian eigschtöd. De Meran vom Voik hobm owa de Mocht und Kaumpfschtäakn da Tepanekn gfiacht.
  • Dahea hobms sogoa iwalegt obs ned ois a untaweafungsgestn des heilige Bündl mid de oidn Bana vo eahnan Schtodgod Huitzilipochtli za de Tepanekn schickn soitn.
  • Daun sans iwaeikemma, das an gesaunntn anan Tepaneknhof schicka woin. des woa a gfeahlige Afgob, den fia Gesaunnte hods jo koa diplomatische Immunität ned gebm. Und so woahs ned unübli, das unliabsaume Gesaunnte, mid außagrißanan Heazal, am Opaschtoa glaunt san.
  • Dahea woit koana vo de Odlign freiwilli den Aftrog iwanehma.
  • Do hod se em Itzcoatl sei Neffe, da Tlacaelel freiwülli fia de Gesauntschoftarei gmöt. Ea is zwoamoi zan Maxtla in Atzcapotzalco groast und hodn zeascht demuiti an de Kinda und oidn Leid in Tenochtitlan eainnat. Owa da Maxtla hod eahm vazöht, das a jo söwa nixi gegn de Mexica hed, jo se sogoa guad leidn kunnt, owa seine Leid valaungan an Födzug gegn Se und a eahna Vanichtung. Und wos warad ea fia a schlechta Kaisa waun a ned af sei Voik hean darad.
  • Oiso is da Tlacaelel aumtli wuan. Ea hod en Maxtla sein Keapa gsoibt, ois warad a scho gschtuam und hodn mid Fedan am Kopf gschmückt, wia fia a scheene Leich. Nochand hod a eahm an Schüd und a Macuahuitl a Obsidianschweat in de Hend druckt. So woas domois da Brauch fia a offiziöe Kriagseaklearung.
  • Af des affi hod da Maxtla em Tlacaelel den Rot gebm, ea soi liaba duach a Loch in da Maua vaschwindn, den de Tepanekn woin na am Liaban zreißn.
  • Da Tlacelel woa vamuatli nu guad af de Fiaß untawegs, den ea is de vafuigandn Tepanekn endwischt und heul in Tenochtitlan aukema.

1427 hod ma in Itzcoatl zan neichn Tlahtoani eanaunnt.

  • A Odliga hod eahm a Redn ghoitn in dea a eahm af seine Pflichtn eainnat hod:
  • "Wiast Du eppa den Zaumbruch und de Zaschtearung vom Reich zualossn? Wiast Du de Bürd de da afealegd wiad oschüttln? Wiast Du zualossn, das de oidn Leid, Waisn und Witdibn zgrund gengan?
  • Und daun zan Schluß seina Red hi:
  • "....Tenochtitlan is volla Freid und Juwö unta Deim Schutz. Es woa da Schtod zmuat wia ana Witdib. Iazt is owa iah Gemoih und Begleita zruckkema, um ihr Rückhoit und Hüf zgebm.
  • Mei Suhn, fiacht di ned vua da Lost da Miahn und sei ned betriabd. Sundan denk drau, das da God, dem sei Ebnbüdl Du bist, Dia zua Seitn is und Dia beischteh wiad. (noch da Iwalifarung vom Duran)

Ois sein mülitarischn Owagenareu (Tlacateccatl) hod a se sein Neffn, em Ilhuicamina eanaunnt. Zan End vo 1427 is da Tlahcateotzin, da Tlahtoani vo da Schwestaschtod Tlatilolco vo de Tepanekn umbrocht wuan.

  • 1428 hod a seim Neffn em Nezahualcoyotl in Tenochtitlan Asyl gebm, weu de Tepanekn an Moadaftrog fia eahm ausgschtöd hobm.
  • Im söbn Joah is Tenochtitlan vo de Tepanekn eikroast, belogad und vo ollm Nochschub ogschnittn wuan.
  • Domois hods nu koana Dammschtroßn za de Seeuafa gebn. So hobm se de Kämpf mera mid de Boot und an de Uafa ogschpüd. Noch a boa Monat hobm se de Tepanekn zruckzogn.
  • Da Nezahuacoyotl hod zweng seina obnteialign Vagaunganheid vü Zuaschproch ghobd. Aus olle meglign Schtäd san junge Beaschn kema, de unta eahm kempfn woitn. Und so hod aa a kloane Armee afgschtöd und mid da Hüf vo de Mexica en Kaumpf gegn de Tepanekn augfaungt.

1428 is da Ilhiucamina da Owagenareu af an Kriagszug mid drei Aundare mexicanische Ausschpäha vo tepaneknfreindlige Acolhua gfauga gnumma woan. Ois gneist hobm, wens do gfaunga hobm, woan Se se ned sicha wos mid eahm aufaunga soin. So haumsn za de mid de Mexica vafeindn Chalca weidagebm. De woitn a vahungan lossn, owa igandwia is a eahna auskemma. Owa a Freindschoft za de Chalca is bei Eahm so natiali ned afkemma.

  • Weu jo sei wichtigsta Mau Gfaungna woa, hod da Itzcoatl an neichn Postn eigfiad. Den Cihuacoatl, de Weiblige Schlaung, den ziwün Schtovatreta vom Kini. Und ois easchtn Cicuacoatl hod a sein muatign Neffn em Tlacaelel eanaunnt.

Da Befreiungskriag

Werkeln

Mid da Hüf vo de Tenochtitlan Mexica und seina zaumgwüifitn Armee hod da Nezahualcoyotl aun da estlign Seeseitn affi de Schtäd eaowad. So a de Haubdtschtod Teutzcuhco und hod de tepaneknfreindlign Pilli (Odlign) vajogd.

  • Owa fia an Kriag af da Linkn Seeseitn im Haubtlaund vo de Tepanekn, dazua woan eahnane Truppn zweng und zgring.
 
Da Nezahualcóyotl im Kriagsgwandl; Büdl ausn Kodex Ixtlilxochitl.
  • Da Nezahualcoyotl hod seine Gesaunntn in de greßan Schtäd und Schtootn gschickt. Zweng seim schtoakn Iwalebmswülln woa a in de moastn Altepetl bei de jungan Odlign a bewundata Mau und ma hod eahm vatraud.
  • Und so hobm se so Maunche an de Schmehungan und an des kiazlige Kinischtabm duach em Matzla, em Tepaneknherrscha eainnat.
  • Mera woan bereit gegn de Tepanekn an Aufschtaund zfian.
  • De Tlaxcaltekn und do woan de Meran de Huexotcinca wan dabei. Nua de Chalca, de jo mid de Mexica vafeind woan und se mid Eahna scho Joahzehnte bluadige, valustreiche Schlochtn gfiad hobm, haum eahna ned traud und san dahoam blibm.
  • A de Tlatilolko Mexica, de bis iazt se in de Kämpf ned eigmischt hobm woitn midkempfn.
  • Des wos Olle geint hod, des woa nua da gmoasauma Häß afm Maxtla und seine Tepanekn.

Mid da Zeid san oiweu mera tributpflichtige Schtäd vo de Tepanekn ogfoin. Und am linkn Seeuafah hods vamuatli aa a Gsaundtschoft vom Nezahualcoyotl zan Totoquihuaztli aus da Tepaneknschtod Tlacopan gebm.

  • Den 1429 hobm de Mexica und Acolhua unghindat bei dera Schtod laundn kena und haum daun in da Nachn a groß Tepaneknheer eastmoli gschlogn.

Do hods daun bei de Aundan koa zruckhoidn mea gebm und Olle woitn af de Tepaneknhaubdtschtod losziagn.

Daun san de Vabündetn in drei Heersäun viagruckt.

  • De Easchte hod da Nezahualcoyotl midm Herrscha vo Huexotzinco augfiat.
  • De Zwoate hod da Itzoatl mid de Mexi´ca aus Tenochtitlan, vaschteakt duach Kontigent vo de Huexotzinca augfiat.
  • Cuauhtla`toa aus Tlatelolco hod midn Moteuczuma Ilhuicamina aus Tenochtitlan de dritte Heersäun gleit.

De Haubtschtod da Tepanekn Azcapoltzacos is vo de Acolhua und de Mexica noch ana 114 Tog dauandn Belogarung eaowat wuan. Und de Mexica hom dabei deran Eiwohna masakriat. Da Legend noch soi da Maxtla gflohn und eascht 1431 in an Vaschteck gfundn wuan sei. Und da Nezalhuacoyotl soi eam söwa s´Hearz aussagrissn hom. Ea hod de vom Hearz otropfadn Bluadstropfn in olle Windrichtungan vaschprizt und daun hod a augschoft, das da Maxtla a scheene Leich kriagd, wias an großn Herrscha zuaschtehd.

Da Aztekn-Dreibund

Werkeln
 
De Simboi da drei Schtodschtootn vom Dreibund. Tetzcuhco (Acolhua), Tenochtitlan (Mexica) und Tlacopan (Tepanekn).

Noch da Nidaschlogung vom Tepaneknreich hom se de beteuligtn Herrscha gedaunkn gmocht wias des Reich afteun soitn. Des gaunze Reich war fia a Voik zan Beheaschn zgroß gwest. Und vamuatli hedn se des de Vöka a goa ned gfoin lossn und se warn gmoasaum glei af des neiche Herrschavoik losgaunga und laungaudaunde Kriag warn de Foig gwest.

Da Itzcoatl woit am Liabstn nua a Partnaschoft mid de Acolhua. Weu de owa an dreibund augschtrebd hobm, hod a an Tlaxcaltekn -Schtoot gwinscht. entweda de Tlaxcala oda de Huexotzinco. De hobm owa ogwunkn und woitn liaba Alloane bleibm.

  • Do hobm se de Tlatilolco Mexica Hoffnungan gmocht, das zan Dreibund eiglodn wean.
  • Owa de zwoa Födherrn, da Nezahualcoyotl und da Itzcoatl hobm ned fagessn ghobd, das eascht so schpod af eahnane Seitn in de Kämpf eigriffa hobm.

Da Nezahualcoyotl hod söwa nu gnua zduan ghobd, olle Altepetl (Schtäd) aus seim oidn Reich zruckeaowan.

  • Und ea hod befiacht, das waun ma de bsiegtn Tepanekn zschtoak untadrickt, das Se se de nextn Afschtänd zuwazichtn.

Megligawoas hods a scho vua de entscheidandn Schlochtn a Iwaeikunft mid da Tepaneknschtod Tlacopan gebm. Weus jo so unbehindat bei Iah aulaundn hobm kena und vo duat den Kriag in de Tepaneknlaund trogn hobm.

  • Und so hod da Nezahualcoyotl em Itzcoatl iwazeign kena, das gscheida warad a Tepaneknschtod in da Tripplallianz afznehma, weu se daun a de Valiara bessa mid de neichn Mochtvahötniss aufreindn kenan. Und do paßad de Schtod Tlacopan am Bessan.
  • Owa de Mexica hobm se de oide Tepaneknhaubdschtod gsichat und a a boa kloanana Altepetl. Mera Tepaneknschtäd hod ma laundwiatschoftlige Flechn weggnumma und de Odlign und Tempö vo de Mexica iwaschriebm.
  • De bsiegtn Odlign und Fiaschtnfamülien hod ma owa weidaweakln lossn und fia des woans em Dreibund daunkboa und hobm se eigfundn.
  • Das owa da dritte Partna gmeakt hod wea in da Allianz de Musi schpüd, hod ma de Tribut a so afteud.
  • 2/5 fia Tezcuhco
  • 2/5 fia Tenochtitlan
  • Und 1/5 fia Tlacopan.

Waun ma se viaschtod, das jo de Acolhua söwa a groß Reich ghobt hobm, vo dem de Tribut alloane noch Tezcuhco gfloßn san. Und de Mexica sidli vom See, Schtäd vo de Colhua eaowad ghobd hobm und a a boa Tepaneknschtäd in eahna Reich iwanumma hobm, vo de de Tribut nua za Eahna gaunga san, bleibd fia Tlacopan ned oizfü iwrig.

  • Tlacopan hod nua a boa Tepaneknschtäd im Umkroas, am See zuagschprocha kriagt.
  • Da große Rest vom Tepaneknreich woa da Allianz tributpflichti und de san midm bekauntn Schlissl afteud wuan.

A Jeda vo de drei Schtootn woa in seim Reich fia de Gsetzgewung, Religion, Ausbüdung, Mülitäa und Vawoitung alloane zuaschtendi, hod se owa zan gegnsoatign Beischtaund und Intaschtitzung vapflicht.

  • Ma hod se sogoa bei da Tlahtoaniwoih a gegnsoatigs Zuaschtimmungsrecht eigrahmt.

De nochm Kriag fost endvökate Schtod Azcapoltzaco is mid Mexica neich besiedlt wuan. Und za ewign Schtrof hobm de Mexica, den Haubtmoakt fian Sklavnhaundl duathi valegt.

De Neioadnung vo da Gsöschoft

Werkeln

Ob se des so ogschpüd hod oda nua a nochtreglige Gschichtsföschung woa, de ois Eaklearung heahoitn hod miaßn, wiso ma des Voik da Mexicana nochm Kriag bei da Vateulung vo da Beute so bschißn hod.

  • Es san nehmli de fiaschlige Famülie und de Pilli (Odlige) mid Ländareian bedocht woan, saummt de draflebandn Leid. Owa a de Tempön vo de Haubtgedda, de se so za große eignschtendlige Wiatschoftskeapa entwückid hobm. So wia im Middloata de Kleschta in Middleiropa.
 
De Schtäd de untam Itzcoatl eaowad wuan san. Ausm Kodex Mendocino.

De Oafoche Bevökarung, de jo, wia iwaroi, de Haubtlost am Kriag trogn hod, is fost laa ausgaunga. Eahnane Calpulli hobm nua weid voanaunda vaschtraht ligande, schwaa zan Beoawadn Grundschtickl kriagt.

Ois Grund dafia, is des schpoda so eakleat wuan:

  • Vua em Kriag gegn de Tepanekn, soi des Voik so kloamuati gwest sei, das es se am Liaban de Tepanekn genzli untawoaffa hed.
  • Do soidn de Odlign gschimpft und em Voik viagschlogn hobm, daß wauns den Kriag gwinnan und so a des Voik beschizt hobm, daß De daun brav fia eahna suagn, (oiso brav oawadn und oiweu schee de Bappn hoitn).

Da Itzcoatl hod a neiche Viaschriftn eigfiat. Da jo de Baamwoi nua in de weida im Sidn owi gwoxn is, woan de Baumwoiumhäng recht teia. So hod a bei da Todesschtrof vias Voik des Trogn vo Baamwoikloada vabotn. Des Voik hod weidahi nua kloada und Umheng aus de Agavnfasan trogn deaffa.

  • Es hod a eigne Sandaln fia de Odlign gem. De woan a fias Voik vabotn.

Da Itzcoatl hod a den Earbodl eigfiat, de Pilli, Pipiltin. hod ma fria leichta ausm Voik afschteign kena, weu ma so gscheid woa oda a so a eafoigreicha und topfara Kriaga, so hods des nua meah im Ausnaumfoi gem. Moast is ma hextns in Deanstodl (Quauhpilli) afgnumma woan, dea owa ned vaebboa woa.

  • Beim Voik und de kloanan Odlign woa ehelige Treu und Monogamie vuagschriebm.
  • Vo de Hochodlign aus da Fiastnfamülie hod ma sogoa valaungt das mid mera Weiwal vaheirat san.
  • Owa a ois Odliga hod mas ned oafoch ghobd. Waun kloanare Vagehn beim Voik nu bschtroft wuan san, is a Odliga glei an Kopf kiaza gmocht woan, zweng da Vuabüdwiakung.
  • Leida hod da Itzcoatl nochm Sieg de Schriftn aus da Hofbibliothek vo Atzcapoltzaco vabrenna lossn. Ois offiziöa Grund is augfiat woan: Es kennt jo noch de Neivateilungan Grundschtreitareian gebm.
  • Nochm Sahugin seina Historia General:
  • "Es hod a Berotung vo de mexicanischn Herrscha schtottgfundn in Dea se bloßn hobm: Es is ned notwendi, das Jeda woaß, wos Schwoaz oda Rod gschriebm schteht.
  • De Lost, de Bürd (vo da Herrschoft) wuad daduach nua lechali gmocht. Und daduach wuat nua da da Owaglaubm im Laund vabroat, den (de Biacha) enthoitn vü Foischs.
  • Da Haubtgrund wiad owa gwest sei, das ma fia de schpodan Genarazionan ned wissn lossn mecht, wia oamsölig de Mexica ois Lezte im Toi vo Mexico aukemma san.
  • Gschicht föschn oda vadrahn woa a bliabte Bscheftigung vom Hochodl da Mexica. Se woitn se damid eahna Viagschicht vaschenan und se söwa iwa de Aundan eahehn. In Eahnane Afzoachnungan hobms vameakt das gaunz alloane ohn Hüf vo Aundare, de Tepanekn bsiegt hedn.
  • Waun se ned Afzeichnungan in kloanare, weida wega liegande Schtäd afgfundn hedn, wissat ma Heid ned, wos se eppa domois wiakli ogschpüd hod.

De Festigung vom Schtoot

Werkeln

Duach de Eifiahrung vo da weiblign Schlaung is em Tlahtoani vü Oawad fian ziwün Breich ognumma wuan, obwoi se da Schtoot um a Vüfochs vagreßad hod. De Eaowarungan und Befriedungsfödzüg san von seim Neffn em Ilhuicamina gfiad woan. So hod se da Itzcoatl a mera um de religiösn Ritn kimman kena.

  • Ois Daunk fian Schtaummesgod Huitzilopochtli hod an iwa de aundan Gedda eahebm lossn und ea hod nu a boa Amtal (Zuaschtendigkeitn) zuagschaßt kriagt. Wos se a scho in de greßan Opfazoihn ausgwiakt hod.
  • 1439 is de Iwabauung vom Haubttempö in Tenochtitlan feati wuan.
  • Eppa 1440 is da Itzcoatl vaschtuam. Ea hod wia koa Zweita de Gsöschoft vo de Mexica umkrömpid und mid da Hüf duach seine zwoa Neffn den Schtodsschtoot vo Tenochtitlan af a fests Fundament gschtöd. Des de schpodan Eaowarungan eascht megli gmocht hobm.

Schau aa

Werkeln

Liaratua

Werkeln
  • Hans j. Prem: Die Azteken. 5. Auflage 2011, C.H.Beck, Minga. ISBN 978-3-406-45835-4
  • Hanns.J.Prem: Geschichte Altamerikas, R. Oldenburg Verlag, Minga 2008. ISBN 978-3-486-53032-2
  • Rudolf Pförtner/Nigel Davids: Alte Kulturen der neuen Welt. Econ Verlag, Wean 1980.
  • Berthold Riese, Das Reich der Azteken- Geschichte und Kultur. C.H.Beck, Minga, 2011.ISBN 978-3-406-61400-2
  • Nigel Davies: Die Azteken: Meister der Staatskunst – Schöpfer hoher Kultur. Econ, Düsseldorf 1979, ISBN 3-499-16950-9.
  • Serge Gruzinski: Die Azteken: kurze Blüte einer Hochkultur. Maier, Ravensburg 1992, ISBN 3-473-51028-9.
  • Martín Borboa: Itzcóatl: Emperador Mexica. Plaza y Valdes, Mexiko-Stadt 1997. (spanisch)
  • Fernando Alvarado, Tezozómoc, Crónica mexicana. 1891.
  • Schroeder, Susan (1991). Chimalpahin & die Königreiche von Chalco . Tucson:. University of Arizona Press ISBN

Im Netz

Werkeln

Kategorie:Amerikanische Geschichte Kategorie:Mittelamerika Kategorie:Indianische Kultur Kategorie:Aztekische Herrscha Kategorie:Tlahtoani Tenochtitlan Mexica

Voh „https://bar.wikipedia.org/w/index.php?title=Nutza:Luki/Itzcoatl&oldid=592294“