Der Bulle von Tölz: Bauernhochzeit
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Bauernhochzeit |
| Produktionsland | Deitschland |
| Originalsproch | Deitsch/Boarisch |
| Läng | 95 Minutn |
| Oitasfreigob | FSK 12 |
| Einordnung | Staffel 2, Foig 4 8. Foig insgesamt |
| Easchdausstrohlung | 2. Feba 1997 auf Sat.1 |
| Stab | |
| Regie | Walter Bannert |
| Drahbuach | Jörg Graser |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Bauernhochzeit is a deitscha Feansehfuim van Walter Bannert ausm Joar 1997 noch on Drahbuach van Jörg Graser. Es is de ochte Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 2. Feba 1997 af Sat.1 ausgstroit worn.
Handlung
WerkelnDe frisch vaheiradte Klara Hopfner findt am Morgn noch da Hoozad stott ian Mo a tode Sau im Bett; an Franz entdeckts dastochn im Stodl. De Kommissarin Sabrina Lorenz stejt fest, doss ban Opfa da Ehering fejt. Da Xaver, oana van Todn seine Briada, dea wo seit dem Poitaomd neamma richti nichtan worn is, hod gseng, wia de Klara mid an Gwahr afs Fejd nausglaffa is. Aft rennt de Kommissarin ia noch. De Klara Hopfner sogt aus, doss froh is, doss ia Mo tod is. Se häd eam nua gheiradt, doss an Voda fia ian fost ochtjährign ledign Buam Max hod, oba dastocha häds an Franz ned. Wea da Kindsvoda is, wuis ned song. Noch guadn Zuaredn ibagibts da Kommissarin as Gwahr.
Da Alois Hopfner wui sei Schwiegatochta neamma afm Hof hom; ea moant, doss de Heirad eh ned guid, wei de Hoozadsnocht ned voizong worn is. Ea hod an Franz no umara fimfe in da Fria alloa on da Hoozadstofl hocka gseng.
Van Karl Hopfner eafoart da Kommissar Benno Berghammer, doss ea zammad mid seine Briada Franz und Xaver de Sau ins Bett glegt hod und da Franz da Klara gengiba mehrmois ibagriffi worn is.
Bei da Obduktion kimmt außa, doss da Franz Hopfner fost a Oikohoivagiftung ghobt häd, oba da Stich mid on Fleischamessa zu ara innan Bluadung und schliaßli zun Tod gfiaht hod. Bei sofortiga medizinischa Huif häd ea ibalebt.
A poar Dog spada – an Franz Homs dawei eigrom – trogt da kloane Max a Lampal afn Heibodn und wui, doss’s fliang leant. Ea hot an Prälatn Hinter goar z weartli gnumma, wia dea eam eakleart hod, doss alloa as Lamm Gottes „das Böse“ bsiagn ko. Da Karl biat da Klara o, as Lampal obazhoin, oba se wui seine „Nettigkeiten“ ned hom und bfreit des Viech liaba sejba. Wias mid an Lampal untam Oarm de Loata wieda obasteigt, nimmt da Karl iara as Viech weg und droht an Maxl mid Lammbron. De Klara wui as Lampal fia ian Buam zruckhom. Da Karl wuis eascht zruckgem, wonn se eam dafia a Bussal gibt, oba des kimmt fia d’Klara ned in Frog. Aft muakst da Karl as Lampal ob.
Kuaz draf wead da Karl van hofoagnan Traktor zammgfoarn und mid schware Haxnvaletzungan ins Kranknhaus brocht; an Foara hod ea woahrscheinli gseng, oba wega ra Amnesie ko ea si ned dro eainnan. De Klara und da Xaver woin zua froglichn Zeit in da Kuche gwen sei. Trotzdem vadächtigt da oide Hopfner jetzad an Xaver, nochdem ea zeascht an Karl im Vadocht ghobt hod, doss dea an Franz dastocha hod, dmid ea in da Eabfoig nochrucka ko. Da Xaver is granti und wui si vo sein Voda nix mehra song lossn; do drischt da Oide mid ara Peitschn af eam ei und wui, doss ea an Moard zuagibt, bis de Kriminala dazuakemman. De Stootsanwäitin Dr. Zirner schafft on Polizistn Pfeiffer, doss ea de zwoa Streithansln ins Kommissariat zun Vahear bringt, oba se vaweigan d’Aussog und deafan wieda hoamgeh. Dort valongt da Xaver, doss sei Voda eam an Hof ibagibt, wei ea de Klara zruckhoin und heiradn wui, oba da Oide weigat si. Aft foart da Xaver zun Eggerhof, as Ejtanhaus vo da Klara.
Da Polizist Pfeiffer ibazeigt de Stootsanwäitin davo, doss da Xaver Hopfner boade Tatn ausgfiaht hod. Wia de Zirnerin und da Pfeiffer mid an Hoftbefej zun Hopfnerhof kemman, schickt da Alois Hopfner de zwoa weg und sogt, doss da Xaver ned dahoam is und doss ea de Soch sejba regln wead. Da Pfeiffer wui eam vafoign, wia ea siagt, doss da Hopfner mid an Gwahr in sei Auto steigt und davofoart, oba da Baua hod eam austrickst und de Roafn van Polizeiwong afgschlitzt.
Da Benno Berghammer hod afm Eggerhof gschlofa, wei ea dort de gonze Nocht Schofkopf gspuid und sei Auto valorn hod. Wia ra vo draußn a Schiaßarei heart, geht ea schnej naus und siagt, wia da Alois Hopfner af an Xaver schiaßt. Dawei da Kommissar vasuacht, an oidn Hopfner vo da Unschuid vo sein Buam z ibazeign, schleicht si da Xaver o. Wia ea sein Voda d’Woffn wegreißt, stiazt dea schwar. Da Alois Hopfner losst si hoambringa, wui oba ned, doss ebba an Dokta oruaft.
Nochdem da Xaver und de Klara afm Standesamt gheiradt hom, geht da Xaver zu sein Voda ans Kranknbett und foadat eam no amoi af, eam an Hof z ibagem; do kimmt da Karl af Kruckn eina und de Briada grotn in an Streit. Dawei vaschlechtat si da Zuastond van Alois Hopfner und ea valongt an Pfoarra. Da Prälat Hinter fiaht de Kranknsoibung duach und nimmt eam de Beicht ob. Da oide Hopfner vazejd eam, doss ea de Klara vagewoitigt hod. Dbei is ia Bua Max zeigt worn.
Wia da Prälat da Famij sogt, da Hopfner häd sein Friedn mid da Wejt gschlossn, untanimmt da Xaver an letztn drenzadn Vasuach, an Hof ibaschriem z kriang, oba do schliaßt sei Voda fia imma d'Aung.
De Kommissarin Lorenz foigt ara Eigebung und steigt zammad mid an Benno Berghammer af an Dochbodn van Hopfner-Owesn, wo se vor a poar Dog an Haffa greislige Spuisocha fian Maxl gseng hod. Se schiaßt an Heliumballon oba, dea wo untam Doch schwebt. Am Schnirl vo dem Luftballon is da Ehering van Opfa bfestigt. De Kriminala woin wissen, ob da Maxl an Traktor in Betrieb nehma ko; do sogt d’Klara, doss ajeda Bua, dea wo af an Bauanhof afwochst, Traktor foarn ko. Jetzad steht fia de Eamittla endguiti fest, doss da Max boade Tatn ausgfiaht hod. Da Bua sogt aus, ea häd an Hunga ghobt und wos zun Essn hoin woin, oba da Franz häd si ned griad. Ea häd eam bloß a weng wehdoa woin, wei ea sei Mama gschlong häd; as Messa war wia vo sejba neiggonga.
De Sabrina Lorenz losst si as Schofkopfgspui zoang und gwinnt afm Eggerhof an Benno sein BMW.
Hintagrund
WerkelnGfuimt worn is haptsächli z Däiz;[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz
Werkeln- Bauernhochzeit in der Internet Movie Database (englisch)
- Bauernhochzeit bei Fernsehserien.de
Beleg
Werkeln- ↑ Bauernhochzeit – derbullevontoelz.de (Memento vom 29. Aprü 2016 im Internet Archive)
| Vorherige Foig 26. Jenna 1997: Bei Zuschlag Mord |
Episodnlistn | Nächste Foig 16. Feba 1997: Tod in der Brauerei |