Genius, Schuster und Marqueur

Der Artikl is im Dialekt Weanarisch gschriem worn.

Genius, Schuster und Marqueur oder Die Pyramieden der Verzauberung is a Zauberposs'n in 3 Aufzüg' vom Johann Nestroy. Des Stückl is 1832 vafosst, owa zu de Lebzeit'n vom Nestroy nia aufg'füaht wua'n. Des Thema und aniche Text-Passag'n håt da Dichta füa Der böse Geist Lumpacivagabundus vawend't.

Daten
Titl:	Genius, Schuster und Marqueur
Originaltitl:	Genius, Schuster und Marqueur oder Die Pyramieden der Verzauberung
Goddung:	Zauberposse in 3 Aufzügen
Originalsproch:	Deutsch
Autor:	Johann Nestroy
Musi:	Adolf Müller senior
Eascheinungsjoar:	1832
Oat und Zeid vo da Handlung:	Die Handlung geht theils in der wirklichen, theils in der Feenwelt vor
Personen
Sonnenglanz, König der Genien Prinz Tausendschön, Prinz Liebesreitz, seine Söhne Pantoffeline, eine Fee, Beschützerinn des schönen Geschlechtes Kaffeluzia, verwitwete Fee, Pantoffelines Schwester Flora, Viola, ihre Töchter Lulu, ein alter Genius, Diener und Factotum des Königs Sonnenglanz Lili, Nymphe im Dienste der Fee Pantoffeline Sulphurelectrimagneticophosphoratus, Zauberer, Magier, Zeichendeuter, Wahrsager, ectr. König Rabenschwarz, Beherrscher eines schwarzen Völckerstammes in der Feenwelt Rappeline, seine Tochter Milibu, ihre schwarze Sclavinn König Kupferplatt, Beherrscher eines kupferfarbigen Völckerstammes in der Feenwelt Brünette, seine Tochter Phylax, Wächter des unterirdischen Zaubergewölbes in Pantoffelinens Pallast Hydridracocrocodilux, ein geharnischter Geist, Wächter ebendaselbst Bellona, Königin der Amazonen Mordiana, Lanzina, Pfeilosa, Amazonen Michel Pechberger, ein Schuster Frau Liesel, sein Weib Johann Kipfel, vazierender Marqueur Adele, seine Gattinn Natzel, Schusterjunge Saufaus, Wirth bey der unbestimmten Ordnung die Wirthinn Nagelberger, Kranzelgruber, Gangelhofer, Streichmüllner, Gäste im Wirthshaus ein Corporal mit Patrouille erster, zweiter Sclave der Genien ein Zwerg Genien, dienstbare Geister, Geisterwache im Zaubergewölbe, Magier, Nymphen, kupferfarbe Sclaven und Sclavinnen des Königs Kupferplatt, Mohrengefolge des Königs Rabenschwarz, Furien, Wache, Gäste, ectr.

No meah gült des füa des 1833 g'schriebane und aa nia g'spülte Stückl Der Feenball.

Inhoit

Tausendschön und Liebesreitz, de zwaa Söhne vom Feenkenich Sonnenglanz, woll'n de Techta von da Fee Kaffeluzia, Flora und Viola, auf kaan Foi heirat'n. Weul jed's Joahr auf Beföhl von da Fee Pantoffeline zwaa lediche Maunnsbülda, de wo net valiabt san, aun de Amazonan ausg'liefat wea'n miass'n, san desmoi de zwaa Prinz'n draun. Da Sonnenglanz frågt den einfältich'n Woahsoga und Zauwara Sulphurelectrimagneticophosphoratus um an Råt, dea wo owa nua „Es wird sich machen!“ dazua sågt – dea anziche Råt, den ea ollweu waaß; drum kommandiat da Kenich in Genius Lulu, Hülf' zum schåffen. Dea hoit zwaa vakråchte Mensch'n, in Pechberger und in Kipfel, mit foische Vasprechungan mitt'n aus an Wiatshaus ois Ersåtzmänna ins Feenreich. Tåtsächlich wea'n dee zwaa von dene Amazonan g'hoit und in denan eahna Reich ois männlicha Dienstbot'n und Kindamadl'n vawend't.

Pechberger: „Das Kindsweib machen, könnt mir g'stohln werden.“

Kipfl: „Der Teufel soll 's Spinnradl hohln.“ (II. Act, 13^te Scene)

Inzwisch'n hå'm se de zwaa Prinz'n mit dene Feentechta valobt, eahna owa scho bei da Valobungsfeia mit da Rappeline und da Brünette de Treu brochen. Von da Pantoffeline dabei dawischt, soll'n's deretweg'n in da Zauwapyramide in hoib weiße, hoib schwoazze oda kupfafoabane Wes'n vawaund'lt wea'n. Wiedarum waaß da Lulu an Råt, ea entfüaht in Pechberger und in Kipfel aus da Gewoit von dene Amazonan und schiabt's neualich ois Dopp'lgänga stått dene Prinz'n unta. De zwaa Mensch'n wea'n prompt vawaund'lt und faungan glei mit da Lili, da Braut vom Lulu, und mit da Milibu, da Sklavin von da Brünette a Techtlmechtl aun. Eifasüchtich streit't da Lulu mit da Lili, de eahm owa de Flüg'l stutzt; außadem erfoah'n de Vawaund'lt'n, dass's nua duach an Zauwapantoffel dalöst wea'n kennan. Beim Vasuch, den Pantoffel aus'm Zauwag'wölb zum stöhl'n, wea'n'sie datåppt und in Stana vawaund'lt. A Fluach von da Pantoffeline aunan Sonnenglanz zagt in anzich'n Weg zua Befreiung:

„[…] eh' diese Nacht vergeht, sollen deine Söhne mit ihren Köpfen, den Zauber der Versteinerung von diesen beyden lösen.“

Entsetzt glaubt da Sonnenglanz, seine zwaa Söhn' miasst'n enthauptet wea'n, und de zwaa Bräut' schmied'n safuat an Rettungsplan:

„Bitten und betteln wier so lang, bis ihr z'wider wird, das kann nicht lang dauern.“ (beide Textzitate aus III. Act, 13^te Scene)

Owa ois se de Prinz'n auf da Flucht aun dene Stanfigua'n de Köpf' bluatich stess'n, haum's damit den Spruch eafüllt und ollas löst si in Wohlgefoi'n auf: De Prinz'n heirat'n de Feentechta, da Lulu sei Lili und de zwaa Lump'n kumman zu eahnare Frau'n zruck, mit'm Vasprech'n, dass sa se bessern wea'n.

Pechberger: „Nur einen Wunsch hätt' ich noch, Professor der Astronomie möcht' ich werden.“

Pantoffeline: „Nein Schuster, bleib bey deinem Leisten.“ (III. Act, 17^te Scene)

Weaksg'schicht'

De genauare Entstehungszeit von dem Stückl is unbekaunnt blieben. Dea schwåche Erfoig von Die Zauberreise in die Ritterzeit dürftat entweda in Nestroy söwa oda in Direkta Carl Carl vom Theater an der Wien bewog'n hau'm, es net aufz'füah'n, obwoi des Stückl bereits fåst featich woa.

Da Aunlåss füa des Werk woa de im Joahr 1832 bei olle Leut' vuahaundene Komet'nfuacht, ausg'löst duach's Auftauch'n vom Encke- und vom Biela-Komet'n, sowia dem füa 1834/35 aug'sågte Halleysch'n Komet'n. So håt's a Aufregung geb'n und sogoa seriöse Zeitungan håm üwa an Z'saummsteßa mit da Erd'n oda wenigst'ns a Vagiftung duach de Gase vom Schwaaf spekuliat. Mauncha unbedoafte Schreiba håt de drei Komet'nnauman durchanaunda g'haut und gaunz wüld auf de Jahrln von 1830 bis 1836 vateult. Sintfluten und da Ausbruch von da Cholera san aa befüachtet wua'n.

A Auffüahrung zu dem Teamin vom Biela-Komet'n im Septemba 1832 warat woahscheinlich da Plan vom Dichter g'wes'n.

A direkte Vualog füa's Stückl kunntat bishea net festg'stöllt wea'n, etliche von de vawendet'n Motiv' (des Amazonanreich, des unterirdische Zauwag'wölb, da Genius mit de g'stutzt'n Flügerln) woa'n gängige Motiv' von ana zeitgenössisch'n Zauwaposs'n.

In an friacha'n Manuskript hot de Pantoffeline no den Nauman Huldine g'håbt, de Kaffeluzia woa Seline und de Milibu woa Mohrenköpfchen.

Weidavaweatung

Des Stückl is zwoa nia aufg'füaht wua'n, håt owa in Nestroy ois „Fundgruab'n“ von Textpassag'n, Couplets und haundelnde Peasonan füa etliche spätare Werk' dient. De foigend'n Weidavaweatungan haum Theatafåchleut' (nochz'les'n beim Friedrich Walla) feststöll'n kenna:

• Der Feenball

A Thema im Bum sein' Liadl (III. Act, 6^te Scene) und des Liadl von da Reserl (III. Act, 2^te Scene) entsprech'n in Komet'nliad (II. Act, 14^te Scene), und aa des Lili-Liadl is aus'n Genius (II. Act, 21^ste Scene)

• Der böse Geist Lumpacivagabundus

Da Zwirn entspricht in Kipfl, da Knieriem in Pechberger, des Komet'nliad vom Knieriem (III. Act, 8^te Scene) dem vom Pechberger (II. Act, 14^te Scene)

• Robert der Teuxel

De Nauman von de Wiatshausgäst' Nagelberger, Gangelhofer und Kranzelgruber san üwanumma wua'n; einzelne Passag'n von da Wiatshausszene (I. Act, 1^te Scene) entsprech'n denan im I. Act, 12^te Scene; de Dialoge Bertram–Liserl (II. Act, 7^te Scene) und Reimboderl–Liserl (II. Act, 2^te Scene) gleich'n denan von Sulphurelectrimagneticophosphoratus–Lili (II. Act, 17^te Scene) und Lulu–Lili (II. Act, 20^te Scene)

• Der Zauberer Sulphurelectrimagneticophosphoratus

Da einfältiche Magier Sulphurelectrimagneticophosphoratus wiad im Genius scho auf de Bühne bråcht; de Prüfungsszene Memek–Plumpsack (II. Act, 8^te Scene) gleicht dera von Sonnenglanz–Sulphurelectrimagneticophosphoratus (I. Act, 8–9^te Scene), dea Dialog Plumpsack–Nelli (III. Act, 8^te Scene) dem von Lulu–Milibu (III. Act, 6^te Scene)

• Das Verlobungsfest im Feenreiche

In Schladriwuxerl sei Auftrittsliad und da Monolog (I. Act, 3^te Scene) entsprech'n denan vom Lulu (I. Act, 6^te Scene)

• Müller, Kohlenbrenner und Sesseltrager

Des Amazonanreich in da eascht'n Fåssung (I. Act, 13^te Scene) gleicht in Amazonanreich im Genius

• Die Familien Zwirn, Knieriem und Leim

De Wiatshausszenan (I. Act, 18^te Scene) und in Knieriem sei Slibowitz-Liad (I. Act, 19^te Scene) san fåst identisch mit dene Wiatshausszenan (I. Act, 12^te Scene) und in Pechberger sein Slibowitz-Lied (I. Act, 13^te Scene); da Natzl (I. Act, 20^ste Scene) is aus'm Schuastabuam Natzel (I. Act,14^te Scene) entstaund'n

Spätare Fachkritik

Da Otto Rommel reiht des Werkl in dera Kategorie von Besserungs- und Zauwastückln ein,

„in denen Menschen auf irgendeine Weise in ein komisch-parodistisch behandeltes Geisterreich versetzt werden und da, umgeben von zauberischen Gewalten, die abenteuerlichsten Schicksale erleben“ (Zitat).

Dazua zöhlt ea aa Der konfuse Zauberer oder Treue und Flatterhaftigkeit.

Literatua

• Hugo Aust: Johann Nestroy; Stücke 4. In: Jürgen Hein/Johann Hüttner/Walter Obermaier/W. Edgar Yates: Johann Nestroy, Sämtliche Werke, Historisch-kritische Ausgabe. Jugend und Volk, Wien/ München 1999, ISBN 3-216-30344-6, S. 99–194, 451–512.
• Fritz Brukner/Otto Rommel: Johann Nestroy, Sämtliche Werke. Historisch-kritische Gesamtausgabe, erster Band, Verlag von Anton Schroll & Co., Wien 1924.